नेतृत्व चयनमा रस्साकस्सी, अध्यक्षमा उद्वव पोखरेलले गरे दाबी

विराटनगर । नेकपा एकीकृत समाजवादी मोरङको मंगलबार सुरु नवौं जिल्ला अधिवेशनको बन्दसत्रले राजनीतिक, सांगठनिक तथा आर्थिक प्रतिवेदन पारित गरेको छ । राति अबेरसम्म भएको बन्दसत्रले प्रतिवेदनहरू पारित गरेको हो ।

जारी अधिवेशनको बन्दसत्रमा अधिवेशन आयोजक कमिटीका संयोजक चन्द्रवीर राईले राजनीतिक तथा सांगठनिक प्रतिवेदन प्रस्तुत गरेका थिए । 

सबै प्रकारको छलफल तथा निष्कर्षका साथ बन्दसत्र सकिएको र बिहीबार बिहान नेतृत्व चयन भई अधिवेशन समापन हुने अधिवेशन प्रतिनिधि प्रेमराज भारतीले जानकारी दिए ।

यसैबीच, नयाँ नेतृत्वका लागि अध्यक्षमा तीन जना आकांक्षी देखिएका छन् । अध्यक्षमा आयोजक कमिटीका संयोजक चन्द्रवीर राई दोहोरिने सम्भावना रहेको एक प्रतिनिधिले बताए । 

त्यस्तै अहिले सहसंयोजक रहेका डा. उद्धव पोखरेल पनि अध्यक्षका आकांक्षी देखिएका छन् भने सोही पदमा दीपक ढकालले आफ्नो इच्छा जाहेर गरेको बताइन्छ । 

उपाध्यक्षमा डिल्ली थापा, भुपाल बस्नेत, वीरेन्द्र यादव, राजेन्द्र सुवेदी र विन्दुकला राईको चर्चा छ । सचिवमा प्रेमराज भारती, कविराज घिमिरे, तुलसी ढकालको चर्चा छ । 

उपसचिवमा भवानी धमला र राज्यलक्ष्मी कटुवालले इच्छा जनाएको एक प्रतिनिधिले बताए । उनका अनुसार, सकेसम्म सर्वसम्मत नेतृत्व चयन गरी बिहीबार जिल्ला कमिटीको घोषणा हुनेछ ।