एयर इन्डिया दुर्घटनामा मृत्यु भएकी क्याबिन क्रु मनिषा थापाको पूर्ख्यौली थलो विराटनगर

विराटनगर । भारतको अहमदावादमा चालक दलका सम्पूर्ण सदस्य लगायत २४२ जनाले यात्रा गरेको एयर इन्डियाको बोइङ ७८७–८ ड्रिमलाइनर जहाज दुर्घटनामा नेपाली मुलकी क्याबिन क्रु मनिषा थापाको मृत्युले उनको परिवार विक्षिप्त बनेको छ ।

जहाजमा रहेका मध्ये एकजना मात्रै यात्रु अद्भुत रुपमा बाँच्न सफल भएको यो दुर्घटनामा ज्यान गुमाएकी क्याबिन क्रु मनिषा थापाको पूर्ख्यौली थलो भने विराटनगर भएको खुलेको छ । भारतीय संचार माध्यमले अहमदावाद जहाज दुर्घटनामा मृत्यु भएकी मनिषाका बाबुको परिवार विराटनगरबाट पटना गएको उल्लेख गरेका छन् । 

२७ वर्षीया मनिषाका बुवा राजु बहादुर थापा अहिले विहार पुलिस अन्तरगत बेगुसरायमा कार्यरत छन् । राजुको सवै परिवार पटनास्थित जगदेव पथ इलाकामा रहेको श्यामा अपार्टमेन्टमा बस्दै आएका थिए ।

मनिषाका बुबा बाहेक उनका दुई काकाहरू बब्लु बहादुर थापा र गुड्डु बहादुर थापा पनि बिहार विशेष सशस्त्र प्रहरी (विएसएपी) को बटालियन–१ मा कार्यरत रहेको भारतीय संचार माध्यम ‘द टाइम्स अफ इन्डिया’ ले उल्लेख गरेको छ ।

त्रसादिपूर्ण दुर्घटनाको बिम्ब बनेको उडान नम्बर एआई–१७१ मा ज्यान गुमाएकी मनिषाले औपचारिक शिक्षा पटनामा पूरा गरेकी थिइन् । उनी जन्म पनि पटनामै भएको हो ।

उनले सन् २०१४ देखि १७ को ब्याचमा सेन्ट जेभियर्स कलेजबाट ब्याचलर अफ बिजनेस इकोनोमिक्समा स्नातक गरेकी थिइन् । त्यसपछि उनी इन्डिगो एयरलाइन्समा ग्राउन्ड सपोर्ट स्टाफका रुपमा उडान गर्ने सपनामा सामेल भएकी थिइन् ।

इन्डिगोपछि मनिषाले अकासा एयरमा काम गरेर थप अनुभव लिइन् र गत वर्षमात्रै एयर इन्डियाको क्याबिन क्रूमा जोडिएर प्रायः लन्डन र अष्ट्रेलियाका उडानमा तैनाथ हुँदै आएकी थिइन् । 

शनिबार पटनास्थित सेन्ट जेभियर्स कलेजमा मनिषाको स्मृतिमा उनका सयौं साथीहरूको उपस्थितिमा शोक सभा गरिएको जनाइएको छ ।

मनिषालाई उनका साथीहरू र अपार्टमेन्टका छिमेकीहरूले हँसिलो अनुहार भएकी छोरीका रुपमा चिनेको बताएका छन् । तर उनको मृत्युको अप्रत्यासित खबरले परिवार सरह दुखित बनाएका बताएका छन् । 

मनिषाका भाई अमितसहित बाबु राजु बहादुर र आमा लक्ष्मी थापा अहिले शवको पहिचानका लागि अहमदावाद पुगेको द टाइम्स अफ इन्डियाले उल्लेख गरेको छ ।

थापाको परिवार विराटनगरमा कहाँ बस्थे र कहिले पटना गएका थिए भन्ने जानकारी दिन विराटनगरमा कोही आफन्तसँग सम्पर्क स्थापना भएको छैन ।