एमाले मोरङ अधिवेशन : उम्मेदवारबारे दुवै पक्ष अझै अनिर्णित

विराटनगर । एकातिर केन्द्रदेखि प्रदेशसम्मका हेभिवेट नेताहरूको एउटा टिम, अर्कातिर विनोद ढकाल एक्लैको अर्को टिम । नेकपा एमाले मोरङको आसन्न १० औं जिल्ला अधिवेशनको मुखैमा नेतृत्व छनोटको कसरतका क्रममा देखिएको यो दृश्यले पार्टीभित्रको चुनावी माहोल तातिएको छ । 

सहमति गराउने प्रयासमा रहेका नेताहरूको प्रयास निष्कर्षममा नपुगे यसपटक बहुसंख्यक नेताहरूको टिम भर्सेस विनोद ढकाल समूहबीचको प्रतिष्पर्धा मोरङमा हुनेछ । 

तर, अधिवेशनको मिति नजिकै आइपुग्दासम्म पनि दुवै समूहले मोरङमा उम्मेदवारको अन्तिम टुंगो भने लगाइसकेका छैनन् । फागुन  १७ देखि १९ गतेसम्म विराटनगरमा चल्ने अधिवेशनले एमाले मोरङको नयाँ नेतृत्व चयन गर्दैछ । अधिवेशनको तिथि नजिकै आइपुग्दा चुनावी प्रतिष्पर्धामार्फत नेतृत्व चयन हुन्छ कि सहमतिबाट भन्ने पनि प्रष्ट भइसकेको छैन । 

जिल्ला संगठन कमिटीका अध्यक्ष बाबुराम कार्कीका भनाइमा ‘मोरङ पार्टी नेतृत्वको चयनका लागि सहमतिको सम्भावना पनि प्रचुर छ ।’ उनका अनुसार केन्द्रदेखि प्रदेश तहसम्मका नेताहरू सहमतिमै नेतृत्व चयन गर्न लागिरहेका छन् । तर, अहिलेसम्म त्यस्तो प्रयासले सफलता पाइनसकेको उनको भनाइ छ । 

संगठन कमिटी अध्यक्ष कार्की आफै पनि जिल्ला अध्यक्ष बन्ने दौडमा सामेल रहेका नेता हुन् । 

संस्थापन पक्षबाट कार्की र राजकुमार ओझा अध्यक्षको दौडमा छन् । एमाले स्रोतका अनुसार अध्यक्ष केपी शर्मा ओली टिमको प्रतिनिधित्व गर्ने पार्टीका कोशी इन्चार्ज एवम् पूर्व मुख्यमन्त्री शेरधन राई, एमाले कोशी अध्यक्ष घनश्याम खतिवडा लगायतका नेताहरू राजकुमार ओझालाई अध्यक्षको रुपमा अघि सार्ने तयारीमा छन् । 

उनीहरूको योजनालाई मुख्यमन्त्री हिक्मतकुमार कार्की, जीवन घिमिरे लगायतका नेताहरूको पनि साथ रहेको स्रोतको भनाइ छ । यो टिमले जिल्ला उपाध्यक्षमा शान्ति लिम्बू र सचिवमा रविन थापालाई अघि सार्ने तयारी गरेको छ । 

‘अन्य पदमा लगभग निश्चित जस्तै हो, अध्यक्षमा कार्की र ओझामध्ये कसलाई अघि सार्ने अन्तिम टुंगो लाग्न बाँकी छ’, संस्थापन समूहका एक नेताले भने ‘सम्भवतः बुधबार साँझसम्ममा एउटा चित्र आइसक्ला ।’ अहिले संस्थापन समूहका कार्की र ओझा दुवै जना अध्यक्ष बन्ने दाबीसहित मैदान नछाड्ने अडानमा छन् । 

‘मैले प्रदेशदेखि केन्द्रसम्मका नेताहरूबाट अघि बढ्नु भन्ने संकेत पाइसकेको छु, त्यसैले म ढुक्क छु’, बाबुराम कार्की भन्छन् ‘सकेसम्म सबैलाई मिलाएर अघि बढ्ने तयारीमा छु ।’

कार्कीले यस्तो आत्मविश्वास प्रकट गरिरहँदा संस्थापन समूहबाट उम्मेद्वार बन्ने दौडबाट कार्की बाहिर भइसकेको दाबी गर्नेहरू पनि छन् । प्रदेशका इन्चार्जदेखि प्रदेश अध्यक्ष र अन्य स्थायी कमिटी सदस्यसम्मले ओझालाई समर्थन गरेका कारण उनी नै उम्मेदवार बन्ने पक्का रहेको बताउनेहरू पनि छन् । कार्कीले त्यस्तो दाबीलाई हल्ला मात्रै मान्नुपर्ने बताएका छन् । 

संस्थापन समूहमै रहेर पनि कोशीमा फरक समूहको नेतृत्व गरिरहेका नेता विनोद ढकालका लागि मोरङ अधिवेशन पार्टीभित्रको आफ्नो शक्ति परीक्षणको निर्णायक घडी बनेर उपस्थित छ । 

अघिल्लो वर्ष सम्पन्न प्रदेश अधिवेशनबाट ढकालले कोशीमा ओली समूहका नेताहरूलाई चुनौती दिएयता उनी प्रदेशमा फरक समूहको नेता बनेर अघि बढिरहेका छन् । कोशीका सबै जिल्लामा अधिवेशन भइसक्दा केही जिल्लामा ढकालले समर्थन गरेका उम्मेदवारहरूले जित हात पारेका छन् । गृह जिल्ला मोरङमा पनि आफ्नो प्रभाव बलियो तुल्याउन यो समूह लागिपरेको छ । 

जिल्लामा बलियो प्रभाव देखाउनकै लागि  ढकालसहितका उनी पक्षका नेताहरू जसरी पनि मोरङमा पार्टी नेतृत्व हात पार्ने ध्येयमा छन् । 

पूर्वमुख्यमन्त्री शेरधन राई, हालका मुख्यमन्त्री हिक्मत कार्कीसहितका नेताहरूसँग एक्लै भिडिरहेका ढकालको मोरङमा  सांगठनिक प्रभाव बलियो रहेको मानिन्छ । प्रतिनिधि छनोटका क्रममा आफ्नो पक्षले ६० प्रतिशतभन्दा जीत हासिल गरेको दाबी गरिरहेको यो समूहले पनि अहिलेसम्म जिल्ला अध्यक्षको उम्मेद्वार टुंग्याएको छैन ।

ढकाल समूहबाट अहिलेसम्म अध्यक्षको रुपमा मोरङ जिससका प्रमुख अजम्बर राई प्रचारमा छन् । उपाध्यक्षमा सागर थापा र सचिवमा सोम थापाको सम्भावना रहेको स्रोतको भनाइ छ । यद्यपि सहमतिको प्रयास चलिरहँदा दुवै पक्षले अहिलेको भन्दा फरक व्यक्तिलाई अघि सार्ने सम्भावना भएको पनि केही नेताले बताएका छन् । 

‘दुवै समूहले स्वीकार गर्न सक्ने अर्को तेस्रो व्यक्तिको खोजी सुरु भएको भन्ने पनि सुनिएको छ’, एमाले मोरङका एक नेताले भने ‘तर, यो कति कामयाव पहल हो भन्न चाहिँ सक्ने अवस्था छैन ।’

लामो समयदेखि संगठन कमिटीको भरमा चलिरहेको एमाले मोरङको जिल्ला अधिवेशनको प्रतिनिधि छनोट प्रक्रिया अन्तिम चरणमा छ ।

निर्वाचनमार्फत आउने प्रतिनिधिहरू छानिइसकेका छन् भने बुधबार ५ प्रतिशत प्रतिनिधि मनोनित हुँदैछन् । एमाले मोरङका अनुसार निर्वाचित र मनोनित गरी कूल ९१० जना प्रतिनिधि हुने छन् । उनीहरूले नै जिल्ला नेतृत्व चयन गर्ने छन् ।