दुर्घटना जोखिमतर्फ ट्राफिक प्रहरीको बेवास्ता

विराटनगर । सडकमा यातायातको तिब्र चाप भएको बेलामा ट्राफिक प्रहरीले साइकल चालकलाई हुन सक्ने दुर्घटनामा बेवास्ता गर्दै आएको छ । 

कानूनी रुपमा जरिवाना गर्न नमिल्ने साधनलाई छुट गर्दा सवारी दुर्घटनाको गम्भिर जोखिम देखिन्छ ।

विराटनगरका सडकमा ट्राफिक लाइट ६ स्थानमा छ । यदाकदा बजार आउनेबाहेक दैनिक बजारमा आवतजावत गर्नैपर्ने सवारी चालकले सवारी नियमको पालना गर्छन् । 

साइकल चालकले भने नियमको पालना नगर्दा र नगराइँदा सम्भावित दुर्घटना कायम छ । 

साइकल चालकले गरेको गल्तीले हुने दुर्घटनाका कारण ठूला सवारी साधनका चालकलाई जेलको सजाय पनि हुन सक्छ । 

विराटनगरमा ट्राफिक लाइट पहिलोपटक जडान भएको बरगाछी चोकको अवस्थालाई सचेत नागरिकले ५ मिनेट नियाल्यो भने दुर्घटनामा मानिसको ज्यान जान केही बेर पनि लाग्दैन भनेर आँकलन गर्न सकिन्छ । 

कोशी राजमार्ग पश्चिमको ग्रामीण क्षेत्रबाट बजारमा आउने आधासरो मानिसले प्रयोग गर्ने साइकललाई ट्राफिक लाइटको नियमले छुँदैन । तर, त्यस्तै दुई पाङ्ग्रे मोटरसाइकल भने कारवाहीको भागिदार हुने गरेको छ ।

एकतर्फी बाटोमा रातो बत्तीले रोकेको र अर्कोतर्फ हरियो बत्ती सुचारु गरेको अवस्थामा थोरै समय दिइएको हुन्छ । 

एक मिनेट भित्रै रातो बत्ती बल्ने भएकाले ट्राफिक लाइट पार गर्न सबैलाई हतार भएको हुन्छ । 

त्यस बेला ठूलो संख्यामा एकतर्फी सवारी साधन तिब्र गतिमा रहेका बेला बीचमा साइकलको प्रवेश हुन्छ । ती लाइनमा रहेका सवारीसाधनले ठक्कर दिंदा साइकल चालकको ज्यान जानसक्ने पनि जोखिम छ ।

यो अवस्थालाई नियालेर तथा इसारामा सवारी ब्यवस्थापन गरेर बसेको ट्राफिक प्रहरीले साइकल चालकको जोखिमलाई बेवास्ता गर्ने गरेको छ । 

सवारी चापका बीचमा साइकल छिराएर ट्राफिक अवरोध गर्ने गरेको र ट्राफिक प्रहरीले नरोकेको बारे जानकारी नभएको मोरङ ट्राफिकका प्रमुख प्रहरी निरीक्षक राजन लम्सालले बताए । 

यातायात ब्यवस्था विभागमा दर्ता भएका साधनलाई मात्रै कारवाही गर्ने कानून रहेकाले साइकल चालकलाई हुने जोखिममा ट्राफिक प्रहरी मौन देखिन्छ ।

यसमा स्वार्थ लुकेको छ । एक जना यातायात ब्यवसायीले ट्राफिक प्रहरीको लुकेको स्वार्थ बारे भने ‘इन्जिनले चल्ने साधनलाई कारवाही गर्दा कमिसनलगायतका सुविधा पाइन्छ, साइकललाई कारवाही गरे, हजार रुपैयाँ तिर्न सक्दैनन् ।’ 

ट्राफिक प्रहरीले कानूनमा पनि व्याख्या नगरेका कारण तिब्र गतिको सवारी चापमा साइकलयात्रीलाई ‘मरे मरोस्’ भनेर छाडेजस्तो देखिन्छ ।

कोशी अस्पतालको वरिष्ठ फिजिसियन डा. रोशन खड्का विराटनगरको ट्राफिक लाइट एकदमै अवैज्ञानिक भएको बताउँदै सडक प्रयोगकर्तालाई सचेत भन्दा पनि दुःख दिने नियतले लगाएको जस्तो देखिने गुनासो गर्छन् ।

बिभिन्न देशका ट्राफिक लाइट र प्रयोगका विषयमा यहाँ तुलना नभए पनि जथाभाबी समय राखिएको र एक पटकको छोटो अवधिको रातो बत्तीको अवधि सकिने र दोस्रो पटक पनि हरियो बत्तीको प्रतिक्षामा बस्नुपर्ने गरेको उनले बताए ।

वरिष्ठ चिकित्सक खड्का कोशी अस्पतालबाट बिरामीको सेवा दिन मोरङ सहकारी अस्पतालमा जाने क्रममा तिनपैनीमा ट्राफिक लाइटमा रोकिन्छन् । 

कुनै बेला एक मिनेट भन्दा बढी हरियो बत्ती बल्छ त कुनै बेला आधा मिनेट भन्दा कम । यो अवस्थामा दुई पटकको रातो बत्तीमा पर्नुपर्ने समस्या भोग्नुपरेकाले अब्यावहारिक ट्राफिक लाइट भएको उनको गुनासो छ ।

ट्राफिक लाइटकै कारण बिरामीलाई समेत समस्या हुने गरेको छ ।

अर्को समस्या भनेको क्रस नगर्नुपर्ने साइडमा पनि चालकले सवारी साधन राखेर अवरोध गर्नु हो । ट्राफिक नियमको पालना गराउन चोकमा बसेको प्रहरीले आफ्नै लेनमा जान पाउने सावारी साधनलाई अवरोध हुनेगरी अगाडि बाटो छेकेका साधनलाई सचेत गराएको पाइँदैन । 

मोरङका प्रहरी उपरीक्षक नारायण चिमरिया सडकमा सवारी चलाउने सबै ट्राफिक भएकाले सचेतना प्रहरीको मात्रै नभई सडक प्रयोगकर्ताको पनि भएको तर्क गर्छन् । 

ट्राफिक लाइट सडक ब्यवस्थापनका लागि भएकाले नियम नमान्ने प्रयोगकर्तालाई कारवाही भने ट्राफिक प्रहरीले गर्ने गरेको उनको भनाइ छ ।

‘विराटनगरको ट्राफिक लाइट नयाँ हो, सबै सचेत भएका छैनन्, हामी सबै मिलेर सचेत गराउनुपर्छ’ उनले भने ।