ग्रामथानमा अध्यक्षको अराजकता

विराटनगर । आफूले चाहेकै व्यक्तिलाई खोलाको ठेक्का दिलाउने योजनामा अरू जनप्रतिनिधि बाधक बनेपछि मोरङ ग्रामथान गाउँपालिकाका अध्यक्ष नमोनारायण माझी अराजक स्वरूपमा प्रस्तुत हुन थालेका छन् । यही क्रममा अध्यक्ष माझीले मंगलबार उपाध्यक्ष गुणवती चौधरीसहितका जनप्रतिनिधिले चढ्दै आएको गाडी र मोटरसाइकल खोसेका छन् । 

यसअघि नै ठेक्का लागिसकेको लोहन्द्रा खोलामा आफूले चाहेकै निर्माण व्यवसायीलाई ठेक्का दिन अध्यक्ष माझी निर्वाचित भएर आएदेखि नै लागिरहेको कांग्रेस र एमालेका जनप्रतिनिधिहरूको भनाइ छ ।

‘गुणवती चौधरी कार्यवाहक हुँदा नै लोहन्द्रा खोला ३ करोड १४ लाखमा ठेक्का लागिसकेको छ, सम्झौता मात्रै बाँकी थियो’, एक जना जनप्रतिनिधिले भने ‘त्यहीबेला उपनिर्वाचन भयो । 

अध्यक्षले लामो समय कार्यपालिका बैठक बोलाएनन् । अहिले आएर पहिल्यै लागिसकेको ठेक्का उनी बदर गरौं भन्दैछन् । त्यो पनि उनले आफ्नो मान्छेलाई ठेक्का दिने नियत राखेका छन् ।’ 

ग्रामथानका अध्यक्ष माझी उपनिर्वाचनमा माओवादीबाट निर्वाचित भएका हुन् भने उपाध्यक्ष चौधरी एमालेबाट निर्वाचित भएकी हुन् । ग्रामथानमा कांग्रेस र एमालेका जनप्रतिनिधिहरूको बहुमत छ । उपनिर्वाचनमा विजेता बनेर आए लगत्तै माझीले पालिकाभित्रका खोलानाला र माटो उत्खनन् क्षेत्रमा मुख्य चासो दिएका थिए । 

मापदण्ड मिचेर उत्खनन् गरिरहेकाहरूलाई नियम अनुसार मात्रै उत्खनन् गर्न निर्देशन दिने प्रमुख प्रशासकीय अधिकृतलाई स्पष्टीकरण सोधेर अध्यक्ष माझीले आफू ठेकेदारको पक्षमा रहेको सन्देश दिएका थिए । 

यहीक्रममा मंगलबार कार्यपालिका बैठक आयोजना भएको थियो । त्यो बैठकमा प्रस्तुत भएका ६ वटा प्रस्तावमध्ये चौथो नम्बरमा लोहन्द्राकै विषय उल्लेख थियो । 

लोहन्द्रामा यसअघि लागिसकेको ठेक्का बदर गरेर नयाँ ठेक्का लगाउनुपर्ने अध्यक्ष माझीको प्रस्तावमा अरू जनप्रतिनिधि सहमत भएनन् । आफ्नो योजनाको विपक्षमा बहुसंख्यक जनप्रतिनिधि उभिएको देखेपछि अध्यक्ष माझी आक्रोशित भएका थिए ।

त्यसपछि उनी जनप्रतिनिधिहरू विरूद्ध खनिएका थिए । 

‘गाउँपालिका मेरो हो, मैले भनेको विषय निर्णय नभए तपाईंहरूले चढ्दै आएको गाडी खोस्छु’, मंगलबारको बैठकमा अध्यक्ष माझीले भनेको कुरा उल्लेख गर्दै उपाध्यक्ष चौधरीले भनिन् ‘कि यो ठेक्का लगाउने निर्णय पारित गर्नुस् हैन भने गाडी कुदाउन दिन्न ।’

अध्यक्ष माझीले यसो भनेपछि अरू जनप्रतिनिधिले उनको शैलीको प्रतिवाद गरेका थिए । 

अध्यक्ष माझीले सुरूदेखि नै गाउँपालिकाका खोलानाला दोहनको योजना अघि सारेको भन्दै कांग्रेस र एमालेका जनप्रतिनिधि उनको विपक्षमा उभिदै आएका छन् । मंगलबारको बैठकमा पनि उनीहरूले पुरानो ठेक्का रद्द गरेर नयाँ लगाउनुको कारण सोधेका थिए ।

‘उहाँले जवाफमा म चुनाव जितेर आएको हुँ, तपाईंहरू झेली गरेर आउनुभएको हो भनेर हाम्रो अपमान गर्नुभयो’, उपाध्यक्ष चौधरीले भनिन् ‘त्यसैले अरू प्रस्तावमा सहमति जनाए पनि लोहन्द्रा खोलाको प्रस्तावमा हामीले असहमति जनायौं । हामीले फरक मत राख्दा उहाँले गाडीको चाबी खोस्नुभयो ।’

कार्यपालिका बैठकमा ठेक्का लगाउन नदिए गाडी खोस्ने धम्की दिएर गाडी खोसेका अध्यक्ष माझीले बैठकपछि एउटा भिडियो सामाजिक सञ्जालमा हालेर लोहन्द्रा खोला पालिकाको मुख्य आम्दानीको स्रोत भएको र त्यही आम्दानी नहुने भएपछि जनप्रतिनिधिले चढ्ने गाडी फिर्ता लिने निर्णय गरेकोे दाबी गरेका छन् ।

एकपछि अर्को विवादमा मुछिदै गएका अध्यक्ष माझीले मंगलबार उपाध्यक्ष गुणवती चौधरी र वडाध्यक्ष यादव खतिवडाको सवारी साधनको चाबी खोसेका छन् । 

उपाध्यक्ष चौधरीले भने अब आफूहरू पालिकाको गाडी नचढ्ने र अध्यक्षलाई पनि चढ्न नदिने बताएकी छन् । कांग्रेस र एमालेबाट निर्वाचित जनप्रतिनिधिहरूले बक्राहासहितका खोलाबाट अवैध उत्खनन् गराउन अध्यक्षको मिलेमतो रहेको आरोप लगाउँदै आएका छन् । 

अध्यक्ष माझीले यस अघि अबैध उत्खनन रोक्न भन्ने प्रमुख प्रशासकीय अधिकृतलाई स्पष्टीकरण सोधेका थिए भने केही दिन अघि मात्रै आफूखुसी कार्यपालिका बैठक गरेर मनलागी  निर्णय गरेका थिए । 

उपाध्यक्ष चौधरीसहितका जनप्रतिनिधि अध्यक्षको कदमविरूद्ध अदालत गएपछि निर्णय कार्यान्वयन नगर्न अदालतले आदेश दिएको थियो । 

अध्यक्ष माझीले एकलौटी रूपमा पालिका चलाउन खोजेको तर त्यसमा अरू बाधक भएपछि एकपछि अर्को अराजकता प्रदर्शन गरेको अन्य जनप्रतिनिधिको आरोप छ ।