Biratnagar, Morang, Nepal
२१ चैत २०८१, बिहिवार
+977 21 450305, 515728, 578305
खेलकुद

नरेश श्रेष्ठ स्मृति यु–१९ राष्ट्रिय क्रिकेट प्रतियोगिता

एक अगावै लुम्बिनी फाइनल प्रवेश, बाग्मतीसँग पराजित भएपछि आयोजक कोशी प्रतियोगिताबाट बाहिर

उद्‌घोष सम्वाददाता
१७ कार्तिक २०८१, शनिवार

विराटनगर । विराटनगरमा जारी नरेश श्रेष्ठ मेमोरियल वाइवाई पुरुष यु–१९ राष्ट्रिय क्रिकेट प्रतियोगिताको फाइनलमा लुम्बिनी प्रदेश एक खेल अगावै फाइनलमा प्रवेश गरेको छ । आयोजक कोशी प्रदेश भने शनिबार बाग्मतीसँग पराजयका कारण प्रतियोगिताबाट बाहिरिएको छ । 

बैजानाथपुरस्थित गिरिजाप्रसाद कोइराला खेल मैदानमा टस जितेर ब्याटिङ रोजेको बाग्मतीले कोशी प्रदेशलाई ७० रनले पराजित गरेको हो । पराजित भएसँगै कोशीको फाइनल यात्रा समाप्त भएको छ ।

बाग्मतीले निर्धारित ५० ओभरको ४८ दशमलव ३ बलमा सबै विकेट गुमाएर १८१ रन बनायो । बाग्मतीका सार्थक धिताल र उत्तम मगरले ३५–३५ रन बनाए । कोशीका प्रतीक पोखरेलले ३ विकेट लिँदा प्रेम कामतले पनि ३ विकेट लिए ।

१८१ रनको लक्ष्य पछ्याएको कोशी प्रदेशले २९ दशमलव ५ बलमा अलआउट हुन पुग्यो । कोशीले १११ रनमा सीमित भयो । 

कोशीका सोनु अन्सारीले सर्वाधिक ३० रन बनाउँदा कृतिक कामतले २६ रन जोडे । ५ विकेट लिन सफल भएका बाग्मतीका दिपक सेरला प्लेयर अफ म्याच घोषित भए । 

उनले १० ओभरमा ३ मेडन राख्दै २० रन खर्चिएका थिए । बाग्मतीले ४ खेलमा २ मा जित हात पार्दै तेस्रो स्थानमा उक्लिएको छ । कोशीले खेलेको ५ खेलमा १ खेलमात्रै जितेको छ । चार खेलमा पराजित हुँदै छैटौँ स्थानमा पुगेको छ ।

मेरिलिबोन ज्वाला क्रिकेट मैदानमा शनिबार नै भएको अर्को खेलमा लुम्बिनीले गण्डकी प्रदेशलाई ५ विकेटले पराजित गरेको छ । 

शनिबार बिहानको वर्षाले २७ ओभरमा छोट्याइएको खेलमा टस जितेर ब्याटिङ गरेको गण्डकीले ९ विकेट गुमाई ८६ रन बनायो । गण्डकीका सोहेल कुवँरले सर्वाधिक २५ रनको योगदान दिए । लुम्विनीका सन्तोष यादवले ३ विकेट लिँदा आकाश त्रिपाठीले पनि ३ विकेट लिए ।

८७ रनको विजयी लक्ष्य पाएको लुम्विनीले २२ दशमलव ४ बलमा ५ विकेट गुमाउँदै पार गरेको थियो । लुम्बिनीका सन्तोष यादवले सर्वाधिक नटआउट ४४ रन बनाए । 

गण्डकीका अप्राजित पौडेल र सिब्रिन श्रेष्ठले समान २–२ विकेट लिए । 

प्लेयर अफ द म्याच लुम्विनीका अलराउण्डर खेलाडी सन्तोष यादव घोषित भए । अर्जुन कुमाल नेतृत्वको गण्डकी प्रदेश आफ्ना ५ खेलमा २ मा जित र ३ मा पराजित हुँदै ४ अंकका साथमा चौथो स्थानमा रहेको छ ।

बैजनाथपुरमा हुने आइतबार सुदूरपश्चिमबागमती प्रदेश तथा मेरिलिबोन ज्वाला क्रिकेट मैदानमा गण्डकी र कर्णाली प्रदेशबीच खेल हुने जनाइएको छ ।

View : 238

Copyright © 2023 -2025. Udghosh Daily. All Rights Reserved