नेताहरूको व्यवहार र जनताको असुविधा

लोकतन्त्रको बदनाम हिजोआज धेरैजसो नेता र कार्यकर्ताको गलत कार्यशैली र दृष्टिकोणका कारण भइरहेको छ ।  शनिबार (माघ ५ गते) मोरङको ग्रामथानमा नेकपा माओवादीको आमसभा भएको थियो । सो सभा माओवादीले गाउँपालिका अध्यक्षको निर्वाचनमा विजय हासिल गरेको खुशीयालीमा जनतालाई धन्यवाद दिने उद्देश्यले आयोजित गरिएको थियो ।

पार्टी अध्यक्ष पुष्पकमल दाहाललाई मुख्य वक्ताका रूफमा राखिएको थियो । जनतालाई धन्यवाद दिने कार्यक्रम राख्नु राम्रो हो, तर कार्यत्रमको स्थल चयन गर्दा आयोजकले सोचविचार नगरेको देखिन्छ ।
कार्यक्रम मुख्य सडकमा, गाउँपालिकाको अगाडि राखिएको थियो ।

आयोजकले यो विचार गर्नु पर्छ कि यस्तो कार्यक्रम मुख्य बाटोमा नगरी अन्य स्थानमा राख्नु उचित हुने थियो । यो एउटा उदाहरण मात्र हो, तर लोकतन्त्र प्राप्तिको पछिल्लो समय धेरै यस्ता कार्यक्रमहरू भइरहेका छन्, जसका कारण जनतालाई असुविधा भोग्नु परेको छ ।

समाचार अनुसार, मुख्य बाटोमा कार्यक्रम राख्दा एम्बुलेन्सको आवागमन अवरुद्ध भएको थियो । यस्तो परिस्थितिमा आयोजकहरूले यसको प्रभाव कति गम्भीर हुन्छ भनेर बुझ्न सक्नु पर्दछ ।

पटक–पटक प्रधानमन्त्री समेत भैसकेको व्यक्तिले बोलिरहँदा  एम्बुलेन्सले बाटो माग्दा त्यस्तो कार्य किन गरिएको भनेर कार्यकर्तासम्मलाई सचेत गराउनु पर्दथ्यो । जिम्मेवार राजनेताले  कार्यकर्ताले  जानेर वा नजानेरै गरेको गल्तीलाई  सच्याउन  लगाउनु पर्छ ।

धेरै जनता जम्मा गरेर भाषण गर्दा आवतजावतमा असर परेको जनताको  बारेमा पनि सोच्नु पर्ने  हुन्छ । जनताको असुविधा र कठिनाइको प्रवाह नगरी कार्यक्रम आयोजना गर्दा लोकतन्त्रको साँचो ऊद्देश्यबाट हामी टाढा जान्छौं । 

यसरी जनतालाई असर नगरी यस्ता कार्यक्रमहरू आयोजना गर्न आयोजकहरूले सचेत हुन आवश्यक छ । यस्ता खालका कार्यत्रमहरु अरु दलका जिम्मेवार नेताहरुले पनि गर्दै आएका छन् । यसले समग्रमा लोकतान्त्रिक व्यवस्थालाईनै व्यङ्ग्य गर्दै आएको छ ।

त्यसको लगत्तै मंगलवार .(माघ ८ गते)  नेपाली कांग्रेसका युवा नेता गगन थापा विराटनगर विमानस्थलमा आउँदा विभिन्न तह र तप्काका माला र खादा लिएर स्वागत गर्नेहरुको लर्को देखियो । एकातिर  विमानस्थलमा सुरक्षाकर्मीलाई व्यवस्थापन  गर्न समस्या पर्छ नै ।  

त्यो समयमा सर्वसाधारण, कार्यकर्ता मात्र  नभएर  शिक्षक अनि कर्मचारी पनि  जनताको काम छोडेर स्वागतमा जान्छन् । यसरी जनताको काम छोडेर नेताको स्वागत गर्न जानु लोकतान्त्रिक पद्धतिको शुद्धता होइन । यदि नेताले  शिक्षक र कर्मचारीलाई  किन प्रश्न गर्दैनन् –तपाईं किन पढाउन छोडेर  आउनु भयो ? भनेर ।

लोकतन्त्रको साँचो अर्थ भनेको नीति र नियमको पालन गर्नु हो । यसका लागि कार्यान्वयनलाई प्राथमिकता दिनु पर्छ । कर्मचारीले कार्यालय समयमा जनताको काम नगरी नेताको स्वागतमा जानु लोकतान्त्रिक प्रक्रियामा त्रुटि हो । यस्ता घटनाहरूले लोकतन्त्रको सिद्धान्तलाई कमजोर बनाउँछन् र जनताको विश्वासलाई हानी पुर्‍याउँछन् । 
 

भर्खरै नेपाली कांग्रेसका एक नेतामाथि आक्रमण भयो त्यहाँ ती नेताको गल्ती थिएन तर त्यो गल्ती गर्ने नेताहरुका कारणको एउटा आक्रोश हुनु पर्दछ ।  किनभने भीआईपी (अति विशिष्ठ व्यक्ति) भनेर जनताको बाटो छेक्ने  प्रवृत्ति बढ्दो छ । जनताबाटै निर्वाचित मन्त्री, राष्ट्रपतिको सवारी भन्दै घण्टौ जनता हिड्ने बाटो रोकिन्छ भने त्यहाँ जनता आक्रोषित हुनु अस्वाभाविक भन्न मिल्दैन ।

अन्ततः, कुनै पनि सभा सम्मेलन गर्दा स्थानीय प्रशासनलाई जानकारी दिनु पर्ने कानूनी प्रक्रिया छ । तर के प्रशासन पार्टीको पक्षबाट मात्र हेरिरहेको छ ? यदि आयोजकहरूले कार्यक्रम गर्दा जनतालाई कस्तो असर पर्छ भन्ने कुरा सोचेनन् भने सुरक्षा निकाय र प्रशासनले चुप लागेर बस्नु उचित हुँदैन ।

विराटनगरको महेन्द्रचोक पूर्व हिमालय रोडको कुरा गर्ने हो भने त्यो स्थान राजनीतिक दल लगायत विभिन्न संघसंस्थाको आशन र भाषण गर्ने मुख्य थलो भएर पनि लथालिङ्ग बनाइएको छ ।  जोगवनी धरान रोडबाट मुख्य बजार छिर्ने एक मात्र फराकिलो सो सडक आज नेताहरुको भाषण गर्ने थलो मात्र बनेको छ भन्दा अत्युक्ति नहोला  । 

रमणीय पार्क बनाउने योजना  केही  दुई चार वटा बोटबिरुवा रोपेर नक्शामै सीमित भएको छ । त्यसमा पनि शनिवार स्थानीय बजार लगाउनाले एम्बुलेन्स पनि नछिर्ने गरी बाटो अवरुद्ध हुने गरेको छ । शनिबार लाग्ने गरेको बजारले फोहोर छोडेर जाने हुँदा मुख्य चोक हेरी नसक्नु बन्ने गरेको छ ।  

यी  वर्तमान देखिएका केही उदाहरणहरू  हुन् ।  यस्ता कमि कमजोरीहरु कुनै एउटा पार्टी वा व्यक्तिले गर्‍यो  भन्दा पनि नेपालका  ठूला दलहरुले  कहिले र कहाँ–कहाँ गल्ती गरियो भनेर नसच्याएसम्म यो सुन्दर लोकतन्त्र अझै बद्नाम हुने निश्चित छ । त्यसैले लोकतन्त्रलाई सबैको सम्मान गर्नलायक बनाउन गल्ती कमी गर्दै जाने प्रयास गर्दै जानुपर्ने देखिन्छ, सबैलाई चेतना भया ।