शिक्षामा अपेक्षाकृत सफलता हासिल छैन : पूर्व राष्ट्रपति भण्डारी

इटहरी । पूर्व राष्ट्रपति विद्यादेवी भण्डारीले शिक्षा क्षेत्रमा पर्याप्त लगानी भएपनि अपेक्षाकृत सफलता हासिल गर्न नसकिएको बताएकी छन् । 

इटहरीस्थित जनता माध्यमिक विद्यालयको ६८ औं स्थापना दिवशको अवसरमा मंगलबार आयोजित कार्यक्रममा बोल्दै पूर्व राष्ट्रपति भण्डारीले सरकारले शिक्षा क्षेत्रमा लगानी गरे अनुसारको शैक्षिक प्रणालीमा सुधार नभएको धारणा राखिन् ।

शैक्षिक क्षेत्रको सुधारका लागि सबैको समन्वय आवश्यक रहेको उनको भनाई थियो ।

कोशी प्रदेश विश्वको सर्वोच्च शिखर सगरमाथादेखि होचो स्थान कचनकबलसम्म रहेको स्थान भएकाले त्यसबाट उल्लेख्य फाइदा लिन सक्नुपर्ने भण्डारीले बताइन् । 

सांस्कृतिक र प्राकृतिकरुपमा सम्पन्न कोशी प्रदेशको स्रोत र साधनलाई उपयोग गर्न आवश्यक पर्ने जनशक्ति शिक्षा क्षेत्रबाट प्राप्त हुने भएकाले त्यसतर्फ ध्यान दिनुपर्ने भण्डारीले बताइन् ।

कार्यक्रममा विद्यालयलाई सहयोग गर्ने बिभिन्न ब्यक्तिहरुलाई पूर्व राष्ट्रपति भण्डारीले सम्मान गरेकी थिइन् ।