सरकार र राजावादीप्रति एकीकृत समाजवादी आक्रामक

विराटनगर । नेकपा एकीकृत समाजवादीका शीर्ष नेताहरूले पश्चगामी चलखेलको आधार सरकारले निर्माण गरेको आरोप लगाएका छन् । 

राजावादीहरूले राजधानीमा गरेको अराजक प्रदर्शनपछि मंगलबार विराटनगरमा भेला भएका नेताहरूले पश्चगामी षड्यन्त्र कहिल्यै सफल नहुने तर उनीहरूका लागि सरकारले आधार बनाइदिएको बताएका हुन् । 

एकीकृत समाजवादी मोरङको नवौं जिल्ला अधिवेशन उद्घाटनका लागि आएका अध्यक्ष एवम् पूर्वप्रधानमन्त्री माधवकुमार नेपालले आफ्नै वंशनाश गर्नेहरूलाई फेरि ल्याएर पुनः दास बन्ने बाटोतिर नलाग्न जनतालाई आह्वान गरेका छन् । 

‘२४० वर्ष शासन गरेको वंशवादी परम्पराबाट जनताले फेरि के खोजेको के हो ?’, नेपालले भने, ‘फेरि दास हुन खोजेको हो ? पछाडि फर्किन खोजेको हो ?’  राजावादीहरूप्रति आक्रामक रुपमा प्रस्तुत भएका नेपालले सयौं वर्ष राजा र राणाले देशलाई लुट्ने, चुस्नेबाहेक कुनै काम नगरेको उल्लेख गर्दै भने ‘फेरि जनता यस्तै लुटेरा, हत्याराको पछि किन लाग्नु पर्यो ?

मुलुक फेरि अँध्यारो युगमा फर्किन नसक्ने बताउँदै नेपालले दल र नेताहरूका त्रुटी कमजोरीलाई जोगाएर हैन, सुधारेर अघि बढ्नुपर्ने बताए । 

उनले एमाले–कांग्रेस गठवन्धनले जनमुखी काम नगर्दा पछिल्लो समय पश्चगामी तत्वले टाउको उठाउन खोजेको उनको आरोप थियो । 

पुष्पकमल दाहाललाई धोका दिएर बनेको यो गठबन्धनलाई कुटिल गठबन्धनको संज्ञा दिंदै उनले गठबन्धनले संविधान संशोधनको नाटक मात्रै गरेको आरोप लगाए । 

‘स्वार्थको मेल भएर एमाल–कांग्रेस जुटेका हुन् । उनीहरूको  नियत ठीक छैन’ तीनकुनेमा राजावादीको उदण्डता र समाजवादी मोर्चाको सभाबाट जनताले वास्तविक थाहा पाएको उनले जनाए ।  

‘हामीले शालीनतापूर्वक कार्यक्रम गर्दा तीनकुनेमा के भयो ? कति उदण्डता भयो । कति जनधनको क्षति भयो ? अब जनतालाई झुक्याउने चेष्टा नगरे हुन्छ’  उनले भने । 

महासचिव घनश्याम भुसालले राजावादीहरू मुलुकमा आतङ्क फैलाउने र आतंकित तुल्याएर समाजलाई नियन्त्रणमा लिने षड्यन्त्रमा लागेको बताएका छन् । 

‘उदण्ड, अराजक र अपराधपूर्ण ढङ्गबाट मुलुकमा आतङ्क फैलाएर, आतंकित पारेर समाजलाई हायलकायल पारेर नियन्त्रणमा लिने षड्यन्त्रका साथ उनीहरू अघि बढेका छन्’,  भुसालले भने, ‘यो आतङ्क र षड्यन्त्र किमार्थ सफल बन्ने छैन ।’ 

महासचिव भुसालले राजावादीहरू भारतीय सत्ताको उक्साहटमा मुलुकमा आतङ्क फैलाउन लागेको आरोप पनि लगाएका छन् । 

‘नेपालको सत्तामा जो भए पनि उसको ध्येय नेपाललाई अस्थिर बनाइराख्ने हो त्यो अस्थिरताको आडमा फाइदा लिइरहने भन्ने हो’, उनले भने,  ‘भारतीयहरूले रोक भन्दाभन्दै बनेको यो संविधान उनीहरू हिँडाइदिन चाहन्छन् । 

सविधानको अनुसूचीमा रहेको  चुच्चे  नक्सा स्थगित गर्दिन चाहन्छन् । यसका लागि राजावादीहरू प्रयोग भइरहेका छन् ।  तिनको आड भरोसा भारतीय सत्ता हो ।’ 

गणतन्त्रको नेतृत्वले यसको मुद्दालाई अन्यत्र मोडेर राज्यदोहनमा आफूलाई केन्द्रित तुल्याएको भन्दै भुसालले कमजोरी यहीँ रहेको उल्लेख गरे । 

‘गणतन्त्र उन्नत कृषिमा जानुपथ्र्यो, हजारौं रोजगारी सिर्जना गर्नुपथ्र्यो’,  उनले भने, ‘हाम्रो गणतन्त्र उद्योगमा जानुपथ्र्यो, रोजगारीको अवसर सिर्जना गर्नुपथ्र्यो । 

तर, मूल नेतृत्वले २०६२–०६३ को क्रान्तिको स्पिरिटलाई  बिर्सेर पानीजहाज र चुच्चे रेलतिर लग्यो, भ्यूटावरतिर लग्यो, यस्ता रमाइला कुरामा जनता भुल्याएर राज्यदोहनतिर लाग्यो । मुलभूत रुपमा कमजोरी यहीँनेर भयो ।’  

सत्ताको नालायकी यसैगरी देखिदै जाने हो भने गणतन्त्रमाथि जोखिम बढ्ने उल्लेख गर्दै उनले थपे ‘जनताका छोराछोरीले पढन पाउँछन्न् भन्ने कुराको ग्यारेन्टी नगर्ने हो भने, उपचारको ग्यारेन्टी नगर्ने हो भने, काम गरेर बाँच्न सक्छौं भन्ने ग्यारेन्टी नगर्ने हो भने हामीले गर्ने शासनको वैधता के हुन्छ ? जनता बिरामी भयौ चुनावमा जाऊ । जनतालाई भोक लाग्यो चुनावमा जाऊ भन्ने हो ? यसरी गणतन्त्र बलियो हुन्छ ?’

अहिलेको सत्ता गठबन्धन मिसन ८४ मा लाग्ने क्रममा साना दलहरू सक्ने ध्येयले अघि बढेको बताउँदै भुसालले भने, ‘यो गठबन्धनले के गर्यो ? एउटा काम गर्दै गरेको कर्मचारी निकाल्यो । युनिभर्सिटीको भिसी निकाल्यो । यिनको काम कर्मचारी निकाल्ने मात्र हो । 

विद्युत प्राधिकरण राज्यको धनी संस्था देखेको हुनाले यिनले आँखा लाएका हुन् । यो तरिकाले गणतन्त्र कति दिन बचाउन सक्छौं ? यो नालायकीमा हाम्रो हस्तक्षेप जरुरी भैसकेको छ ।’

राजावादीको चुनौतीका कारण सत्ता गठबन्धनका दल अहिले साना दलसग मिल्न खोजेको तर सारमा यी दुई दल आफू मात्रै जितेर आउने बाटो खोजिरहेको बताए । 

कार्यक्रममा पार्टी वरिष्ठ नेता घनेन्द्र बस्नेत, उपाध्यक्ष जगन्नाथ खतिवडा, नेताहरू बलदेव चौधरी, महेश रेग्मी लगायतले बन्द सत्र र खुला सत्रमा आफ्ना विचार राखेका थिए । अधिवेशनले एकीकृत समाजवादीको नयाँ नेतृत्व चयन गर्नेछ ।