जेभियर्सको १०औं बार्षिकोत्सव

विराटनगर । मोरङको बुढीगंगा गाउँपालिका–२ स्थित जेभियर्स इङ्लिस स्कुलको १० औं बार्षिकोत्सव एवं अभिभावक दिवस शनिबार सम्पन्न भएको छ । बार्षिकोत्सवको अवसरमा विद्यालयका दुई विद्यार्थीहरू र एक खेल प्रशिक्षकलाई सम्मानित गरिएको छ । 

बुढीगंगा गाउँपालिकाका अध्यक्ष जीतनारायण थापा मगरले विद्यालयबाट २०८० सालको कक्षा १२ को परीक्षामा गाउँपालिका उत्कृष्ट गर्ने सोही विद्यालयका विद्यार्थी कुशल विक र कक्षा १० मा ३ दशमलव ७० जीपीए ल्याउने दिया थापा मगरलाई सम्मानित गरेका हुन् ।

बार्षिकोत्सवको अवसरमा विद्यालयले बुढीगंगा–२ का कराँते खेलका अन्तर्राष्ट्रिय प्रशिक्षक प्रभाकर थापा मगरलाई समेत सम्मानित गरेको हो ।

प्राचार्य परेश पोखरेलले विद्यालयलाई विद्यार्थीको सिक्ने थलो बनाउने प्रयासमा लागिपरेको बताए । उनले त्यसमा सफल बन्दै गएको पनि बताए । विद्यालयले अघिल्लो शैक्षिक सत्रदेखि नै शैक्षिक जनशक्ति विकास र व्यवसायिक सीप विकासमा ध्यान दिएको जानकारी दिए ।

विद्यालय संचालक समितिकी अध्यक्ष सरिता थापा मगरको अध्यक्षतामा आयोजित बार्षिकोत्सव कार्यक्रममा शिक्षा विकास तथा समन्वय इकाई मोरङ प्रमुख जीवन गड्तौलालगायत शिक्षासेवीहरू, अभिभावकहरूको उपस्थिति  थियो । 

उक्त अवसरमा विद्यालयका नर्सरीदेखि कक्षा १० सम्मका विद्यार्थीहरूले गीत, कविता, नृत्य प्रस्तुत गरेका थिए । विज्ञान विषयका विद्यार्थीहरूले आफैंले बनाएका विभिन्न प्रकारका रोबोट समेत प्रदर्शनी गरेका थिए ।
जेभियर्स स्कुलमा हाल ८३२ विद्यार्थी अध्ययनरत छन् ।