काम लागेन शिल्पाको ‘यू–टर्न’

विराटनगर । नेकपा एमाले मोरङको १० औं जिल्ला ६ दिनमा सकिएको छ । अधिवेशनमा विनोद ढकाल समूह छाडेर संस्थापन समूहमा आए जिल्लाको उपसचिव बनाउने र आउने निर्वाचनमा मेयरको उम्मेदवार बनाउने आश्वासन पाएपछि विराटनगरकी उपमेयर शिल्पा कार्कीले अन्तिम समयमा विनोद ढकाल समूह छाडेकी थिइन् । 

राजनीतिमा धेरै स्थापित नभएकी उनलाई महानगरको उपप्रमुख बनाउन ढकालकै योगदान धेरै थियो । यद्यपि लामो सहकार्य तोड्दै कार्कीले निर्वाचनको अन्तिम समयमा संस्थापन समूहबाट एमाले मोरङको उपसचिवमा उम्मेदवारी दर्ता गराइन् । 

राजकुमार ओझा प्यानलबाट कार्की उपसचिवको उम्मेदवार बन्दा ढकाल समूहबाट जिससकी उपप्रमुख उषा झा उम्मेदवार बनेकी थिइन् । तर, मोरङका कार्यकर्ताले उषा झालाई उपसचिवमा जिताइदिए, शिल्पा पराजित भइन् । 

उनी झासँग १३ मतले पराजित भएकी हुन् । उपसचिवमा निर्वाचित झाले ४१८ मत पाएकी थिइन् भने कार्कीले ४०५ मत ल्याइन् ।

‘भएभरका ठूला नेताहरूले दबाब र आशा देखाएपछि उहाँले अन्तिममा हाम्रो साथ छाड्नुभएको थियो’, ढकाल समूहका एक नेताले भने ‘उहाँको निर्णय र उम्मेदवारीलाई कार्यकर्ताले नरुचाएको देखियो ।’ 

त्यसो त शिल्पालाई निर्विरोध बनाउने पहल केन्द्रबाटै पनि भएको थियो । तर, अर्की उम्मेदवार उषा झाले कार्यकर्ताको आदेश मान्छु भन्दै चुनाव लड्ने बताएपछि निर्वाचन निश्चित भएको थियो ।