एमाले मोरङ जिल्ला अधिवेशन, सुरु भयो मतदान (फोटो)

विराटनगर । नेकपा एमाले मोरङको १० औं जिल्ला अधिवेशनबाट नयाँ नेतृत्व चयनका लागि मतदान सुरु भएको छ । विराटनगरको बरगाछीस्थित होटल मनास्लु इनमा साढे ९ बजेबाट मतदान सुरु भएको हो ।
मतदानका लागि २२ वटा बुथ निर्माण गरिएका कारण एक पटकमा २२ जनाले मतदान गर्न सक्ने निर्वाचन कमिटीले जनाएको छ ।

निर्वाचन कमिटीले बुधबार विहान ७ बजेबाट मतदान सुरु हुने घोषणा गरेपनि साढे दुई घण्टा ढिला गरी मतदान सुरु भएको हो । 

निर्वाचन कमिटीका प्रमुख निर्वाचन अधिकृत सुरेशलाल श्रेष्ठले एक पटकमा २२ जनाले मतदान गर्ने व्यवस्था मिलाइएको बताए । चारवटा रंगको मतपत्र व्यवस्था गरिएको छ ।

१६५ सदस्यीय जिल्ला कमिटी चयनका लागि राजकुमार ओझा र अजम्बर राईको नेतृत्वमा प्यानलै प्रतिष्पर्धामा उत्रिएका छन् । दुवै प्यानलबाट मतदान स्थल बाहिर लिष्ट बाँडिएका छन् । प्यानल समर्थकहरूले आआफ्नो पक्षमा नाराबाजी समेत गरिरहेका छन् ।

संस्थापन दाबी गर्ने समूहको नेतृत्व ओझाले गरेका छन् । उनको प्यानलबाट उपाध्यक्षमा शान्ति लिम्बू, सचिवमा रविन थापा, दुई उपसचिवमा शिल्पा निराला कार्की र इर्जालाल राजवंशी उम्मेदवार छन् ।

इतर समूहबाट अध्यक्षको उम्मेदवार अजम्बर राई हुन् । उनको नेतृत्वमा उपाध्यक्षमा सागर थापा, सचिवमा सोमराज थापा, उपसचिव द्वयमा सन्तोष बान्तवा र उषा झा उम्मेदवार रहेका छन् ।

मतदान सम्पन्न भएपछि मतगणना भने एमाले मोरङको पार्टी कार्यालय पाञ्चालीमा हुने जनाइएको छ । शनिबार सुरु भएको जिल्ला अधिवेशन दुई दिन लम्बिएको हो । आज अपरान्ह ४ बजेसम्म मतदानको समय तोकिएको छ ।