राम्रो कानुन बनाउन सवै दलबिच सहकार्य हुन्छ : प्रमुख सचेतक लिंथेप

विराटनगर । नेकपा एमाले कोशी प्रदेश संसदीय दलका प्रमुख सचेतक विदुर कुमार लिंथेपले सोमबारदेखि सुरु हुने कोशी प्रदेशसभाको छैटौं तथा हिउँदे अधिवेशनबाट राम्रा कानुन बन्ने बताएका छन् । उनले राम्रो कानुन बनाउन प्रदेश सभाका सवै दलहरूसँग सहकार्य हुने बताए ।

प्रदेश सभाको मिडिया सेन्टरमा आयोजित संसदीय मामिलाका पत्रकारहरूसँगको परिचयात्मक कार्यक्रममा बोल्दै प्रमुख सचेतक लिंथेपले छैटौं अधिवेशनमा सरकारले कम्तिमा १० वटा विधेयक ल्याउन लागेको बताए । प्रदेशसभामा धेरै विधेयक आउन लागेकोले विधेयकमाथिको छलफल पनि पर्याप्त हुने बताए । 

‘हिउँदे अधिवेशनमा बिज्नेश अभाव हुँदैन, दुई महिनालाई पुग्ने बिज्नेश दिने सरकारको प्रतिवद्धता छ, करिव १० वटा विधेयक आउने तयारी छ’ प्रमुख सचेतक लिंथेपले भने, ‘कानुन राम्रो बनाउन सवै दलसँग सहकार्य र पहल हुन्छ, विधेयकमाथि पर्याप्त छलफल गरिन्छ ।’

उनले विधेयकलाई सम्बृद्ध बनाएर कानुनका रुपमा पास गरिने बताए । प्रदेश सभाले बनाउने ऐन कानुनमा संचारकर्मीहरूले समेत बहस चलाउनु पर्ने बताए । प्रदेशसभामा आउने विधेयकलाई सरोकारवालाहरू पनि छलफल गरिने बताए ।

‘स्टेकहोल्डरहरूलाई पनि राखेर कानुन बनाउने कुरामा मेरो जोड रहेको छ’ उनले भने, ‘हतारमा विधेयक पास नगरौं भन्नेमा हामी दृढ छौं ।’