महानगरपालिकाद्वारा ढुंगाका ढक–तराजु नियन्त्रण

विराटनगर । विराटनगर महानगरपालिकाले बिहीबार हाट बजारमा प्रयोग गरिने एक दर्जनभन्दा बढी ढुंगाको ढक र तराजु नियन्त्रणमा लिएको छ । बुधबार महानगरले ढुंगाको ढक विस्थापन गर्ने निर्णय गरेको थियो ।

उपमेयर शिल्पा निराला कार्कीको अध्यक्षतामा बुधबार बसेको ‘बजार व्यवस्थापन तथा उपभोक्ता हित संरक्षण समिति’ को बुधबार बसेको बैठकले अनुगमनलाई तीव्र पारेर ढुंगाको ढक प्रयोगलाई विस्थापन गर्ने निर्णय गरेको थियो । 

बिहीबार महानगरका प्रहरी प्रमुख राजन पौडेलको नेतृत्व टोलीले विराटनगर–५ स्थित पृथ्वीचोकमा लागेको बिहीबारे हाटबाट एक दर्जनभन्दा बढी ढुंगाको ढक र तराजु नियन्त्रणमा लिएको हो । 

बिहीबारदेखि  नगर प्रहरी परिचालन गरेर ढुंगाको ढक, तराजु नियन्त्रण सुरू गरिएको पौडेलले बताए ।

‘हाटबजारमा नापतौल गर्ने ढक ढुंगाको तथा अन्य वस्तुबाट मापन गरिरहेको पाइएको हु“दा अनिवार्य रूपमा मापदण्डबमोजिम ढक प्रयोग गर्न, गराउन नगर प्रहरीमार्फत प्रचारप्रसार गर्ने निर्णय गरिएको छ,’

उपमेयर संयोजक रहेको समितिले गरेको निर्णयमा भनिएको छ ।

 विशेषगरी साप्ताहिक रूपमा लाग्ने हाटबजारमा नापतौलका लागि ढुंगाको ढक प्रयोग गर्ने गरेको पाइन्छ । जसबाट उपभोक्ता ठगिने क्रम बढेको भन्दै महानगरले अबदेखि ढुंगाको ढकलाई पूर्ण रूपमा विस्थापन गर्ने निर्णय गरेको हो । 

त्यस्तै समितिको बैठकले माछा र तरकारीको बिक्रीस्थल छुट्टाछुट्टै स्थानमा रहने व्यवस्था गर्ने निर्णय गरेको छ । 

महानगरको नियमन क्षेत्राधिकारभित्र सञ्चालनमा रहेका सम्पूर्ण मासु पसललाई महानगरको मापदण्डबमोजिम व्यापार गर्ने विषयमा प्रतिबद्ध गराउन १५ दिनको म्याद दिने बैठकले निर्णय गरेको छ ।