कोशीको पर्यटन बर्ष : नारा, लोगो र मस्कट सार्वजनिक

विराटनगर । कोशी प्रदेश सरकारले आगामी बर्ष २०८२ लाई कोशी प्रदेश पर्यटन बर्षका रुपमा मनाउने तयारी तिब्र रुपमा अघि बढाएको छ । यहि चैत २७ गते तेह्रथुमको तिनजुरे मिल्के जलजले (टिएमजे) क्षेत्रमा ‘कोशी प्रदेश पर्यटन बर्ष २०८२’ को औपचारिक उद्घाटनको तयारी गरेको हो ।

पर्यटन बर्ष मनाउन पर्यटन, वन तथा वातावरण मन्त्रालय अन्तरगतको कोशी पर्यटन बर्ष २०८२ को सचिवालयले बुधबार पर्यटन बर्ष झल्काउने नारा, लोगो र मस्कट सार्वजनिक गरेको छ । पर्यटन बर्ष निर्देशक समितिका संयोजक समेत रहेका मन्त्री सदानन्द मण्डलले उक्त नारा, लोगो र मस्कट सार्वजनिक गरेका हुन् ।

पर्यटन बर्षको उद्घाटन प्रधानमन्त्री केपी शर्मा ओलीले गर्ने मन्त्री मण्डलले जानकारी दिए । 

‘कोशीको गौरव हिमालको शान, पर्यटन वर्षमा सवैलाई सम्मान’ भन्ने नारासहित कोशी प्रदेशको पर्यटकीय क्षेत्रको प्रवद्र्धन गर्ने लोगो र रेडपाण्डाले स्वागत गरिरहेको मस्कट मन्त्री मण्डलले सार्वजनिक गरेका हुन् ।

उनले सरकारले पर्यटन बर्षलाई प्राथमिकताको कार्यक्रमका साथ सफल बनाउन लागिपरेको बताए ।

मन्त्री मण्डलले संचारकर्मीहरूले समेत पर्यटन बर्षलाई सकारात्मक प्राथमिकतामा राखेर समाचार सम्प्रेषण गरिदिन आग्रह गरे । सरकारले गर्नसक्ने हरेक कुरामा चिन्ताका साथ काम गरिरहेको पनि उनले दाबी गरे ।

‘प्रदेशको संवृद्धिको बाटो बनाउनका लागि पर्यटन क्षेत्रको विकास महत्वपूर्ण रहेको छ’ उनले भने, ‘कोशी प्रदेशमा स्थल मार्गको प्रयोगबाट पर्यटक भित्र्याउन सकिन्छ, त्यसका लागि सरकार चिन्तित भएर लागिरहेको छ ।’

मन्त्री मण्डलले कोशी प्रदेशभित्र पर्ने हिमाललाई प्रदेशले नै पर्यटन क्षेत्रका रुपमा बिक्री गर्न नसकेको बताए । त्यस्ता महत्वपूर्ण झरनाहरूलाई पनि प्रदेश सरकारले पर्यटक भित्र्याउनका लागि प्रयोग गर्न नसकेको बताए ।

कोशी प्रदेश पर्यटन बर्ष २०८२ को सचिवालयका सहसंयोजक भविष कुमार श्रेष्ठले पर्यटन बर्षको माध्यमबाट कोशी प्रदेशमा ओझेलमा परेका पर्यटकीय क्षेत्रको उजागर हुने बताए ।

अर्का सहसंयोजक कृष्ण शाहले पर्यटन बर्षको प्रचार प्रसारका लागि सरकारी तहबाट पूर्वसूचना दिने खालका कार्यक्रमहरू संचालन गरिंदै आएको जानकारी दिए ।

सरकारले २०८२ साललाई प्रदेश पर्यटन वर्षका रुपमा मनाउन ८२ वटा गन्तव्यको प्रवद्र्धन गर्ने नीति लिएको जनाइएको छ ।

मन्त्रालयले माघ १० गते सुनसरीको कोशीटप्पुमा पर्यटन वर्षको तयारी बैठक आयोजना गरेको थियो । उक्त बैठकमा मन्त्रालयले कोशी प्रदेश पर्यटन वर्ष २०८२ का लागि ८२ वटा गन्तव्यबारे जानकारी गराएको थियो ।

पर्यटन बर्षको तयारीका लागि प्रदेश सरकारले कानुनी प्रक्रियागत उल्झनलाई हटाएर सहजिकरण गर्दै अघि बढेको मन्त्रालयका सचिव विशाल घिमिरेले जानकारी दिए । सचिवालयले पर्यटन बर्षको प्रचार–प्रसारका लागि फडिन्द्र अधिकारीको संयोजकत्वमा उपसमिति गठन गरेको छ । 

उपसमितिका संयोजक अधिकारीले पर्यटन बर्षको प्रचार प्रसारका लागि कोशी प्रदेशमा मिडिया क्षेत्रसँग सकारात्मक उदेश्यका साथ सहकार्यको थालनी गरिसकेको बताए ।