सक्षम गर्भनरको खोजी गरौं : उद्योग संगठन

विराटनगर । नेपाल राष्ट्र बैंकले समग्र अर्थतन्त्रको विकास तथा उद्योग व्यवसाय क्षेत्रको विकासको गतिलाई तिव्र बनाउन र अनुमानयोग्य नीतिगत सुधार गर्ने सक्षम नेतृत्वको खोजी गर्नुपर्नेमा उद्योग संगठनले जोड दिएको छ ।

संगठनले बुधबार बिज्ञप्तिमार्फत राष्ट्र बैंकको आगामी गभर्नर नियुक्तिको प्रक्रियामा चासो देखाएको हो ।

नेपाल राष्ट्र बैंकका वर्तमान गभर्नर महाप्रसाद अधिकारीको पदावधि यहि चैत २४ मा सकिन लागेका कारण निजी क्षेत्रले नयाँ गभर्नर नियुक्तिको बिषयलाई आफ्नो चासोको क्षेत्रमा लिएको छ । सोही कारण सुनसरी–मोरङ औधोगिक क्षेत्रको नेतृत्वदायी संस्था उद्योग संगठनले पनि यो बिषयमा आफ्नो सरोकार दर्ज गरेको हो । 

भावी गभर्नर नियुक्तिका लागि अर्थमन्त्री बिष्णु पौडेलको संयोजकत्वमा तीन सदस्यीय समिति बनिसकेको छ । 

सरकारले नयाँ गभर्नर नियुक्तिको प्रक्रिया अघि बढाएसँगै संगठनले विगत बर्षदेखि  समग्र अर्थतन्त्र र उद्योग व्यवसाय क्षेत्रमा छाएको उदाशिनतालाई मध्यनजर गरी आर्थिक र वित्तीय क्षेत्रको गहिरो ज्ञान भएका देशको मौद्रिक नीति, मुद्रास्फीति नियन्त्रण, ब्याज दरको निर्धारण, वित्तीय स्थिरता जस्ता विषयले औद्योगिक र आर्थिक क्षेत्र सञ्चालनमा महत्वपूर्ण भूमिका निर्वाह गर्ने व्यक्तिको छनौट गर्नुपर्ने सुझाव दिएको हो ।

संगठनका अध्यक्ष राकेश सुरानाले व्यावहारिक अनुभव र बुझाइ भएका व्यक्तिलाई गभर्नर नियूक्ति गर्नुपर्ने माग गरेका हुन् । विगतमा राष्ट्र वैंकले कहिले अत्यन्त कसिलो र कहिले खुकुलो नीति लिएका कारण आर्थिक एवं औद्योगिक क्षेत्र प्रभावित भएको उनले बताए ।

‘अनुभव भोगेको नीजि क्षेत्रले नयाँ गभर्नर नियुक्तिगर्दा देशको आर्थिक अवस्थामा सुधार ल्याउने, व्यवासायिक विकासको गति तीब्र बनाउन र दीगो समृद्धि सुनिश्चित गर्न नेपालका उद्योग र व्यापारका जटिलताहरूलाई राम्रोसँग बुझेको योग्य नेतृत्व आवश्यक रहेको छ’ अध्यक्ष सुरानाले भने, ‘नेपालको मौद्रिक नीति र बैंकिङ प्रणालीलाई सुदृढ बनाई लगानी प्रवाह बढाउन सक्ने र आर्थिक वृद्धिको नयाँ अवसरहरू सिर्जना गरी अर्थतन्त्रलाई स्थिर र सशक्त दिशा दिनु आवश्यक छ, यो आशा र विश्वासलाई नयाँ उचाईमा पु¥याउन सक्ने सक्षम गभर्नर नियुक्त हुने अपेक्षा गरेका छौं ।’

संगठनले अर्थतन्त्रको वर्तमान जटिल समस्याहरुलाई सम्बोधन गर्दै स्वदेशी उद्योगहरूलाई विश्व स्तरमा प्रतिस्पर्धी बनाउन र उद्योग व्यापारमैत्री नीति निर्माण गर्नु नयाँ गभर्नरका लागि चुनौति हुने जनाएको छ ।

नयाँ गभर्नरको नियुक्ति प्रक्रियाले तीव्रता पाउँदै गर्दा गभर्नरको भूमिकाले नेपालको मौद्रिक नीतिदेखि बैंकको ब्याजदर र बैंकिङ क्षेत्रको नियमन, वित्तीय स्थिरता, शेयर बजार र विदेशी विनिमय जस्ता महत्वपूर्ण विषयमा प्रभाव पार्ने जनाइएको छ । 

नयाँ गभर्नरका अहिले राष्ट्र बैंकका डेपुटी गभर्नरहरू नीलम ढुंगाना र बमबहादुर मिश्र, राष्ट्रिय योजना आयोगका सदस्य प्रकाशकुमार श्रेष्ठ लगायतका एक दर्जन व्यक्तिहरुको नाम चर्चामा छन् । 

तर गर्भनर नियुक्तीको विगतको अभ्यासले भने योग्यता र अनुभवलाई भन्दा सत्तारूढ दलहरूबीचको सहमतिले प्रमुखता पाउन सक्ने भन्नेमा चिन्ता बढाएको हो ।