देवकुमारी थापा र बबरसिंह थापा गुठीद्वारा सम्मानको घोषणा

विराटनगर । बबरसिंह–देवकुमारी थापा सेवा गुठी विराटनगरले  प्रत्येक वर्ष समर्पण गर्दै आएको दुई पुरस्कार तथा सम्मानको घोषणा गरेको छ । प्रत्येक वर्ष प्रदान गरिने देवकुमारी थापा स्मृति सम्मान २०८१  सुविख्यात सामाजिक अभियन्ता, लेखक तथा वैज्ञानिक डा. महावीर पुनलाई सुशोभन गरिने भएको छ ।

एशियाको नोबेल पुरस्कारबाट परिचित म्यागेसेसे पुरस्कार समेत पाइसेकेका डा पुनले अन्य धेरै राष्ट्रिय र अन्तर्राष्ट्रिय पुरस्कार पाइसकेका छन् । उनको आत्मकथा  ‘महावीर पुनः सम्झना, सपना र अविरल यात्रा’ अहिले बढी चर्चामा छन् । उनी राष्ट्रिय आविस्कार केन्द्रका संस्थापक हुन् । देवकुमारी थापा स्मृति सम्मानको राशि ५१ हजार रुपैयाँ छ ।

यसैगरी बबरसिंह थापा स्मृति सम्मानद्वारा १८ महिनादेखि निरन्तर कोशी अस्पताल विराटनगरका विरामी, कुरुवालाई  दैनिक खाना र जाडोमा चिया विस्कुट समेत निशुल्क खुवाउँदै आएको ‘नर सेवा, नारायण सेवा’लाई सुशोभन गरिने भएको छ । सो  पुरस्कारको राशि  २५ हजार रहेको छ ।

गुठीका अध्यक्ष कविराज न्यौपानेको अध्यक्षतामा सोमबार बसेको कार्यसमितिको बैठकले उक्त पुरस्कार र सम्मान दिने निर्णय गरेको हो । सुशोेभन समारोह  आगामी २०८२ बैशाख ४ गते विराटनगरमा  गरिने संस्थाका महासचिव दिनेश श्रेष्ठले जानकारी दिए ।

विगतमा सत्यमोहन जोशी, मदनमणि दीक्षित, इन्द्रबहादुर राई, वैरागी काँइला, तुलसी दिवस, मञ्जुल, कुन्ता शर्मा, डा रामवहादुर थापा, कुशेश्वर राई लगायतलाई गुठीले सम्मान गरिसकेको छ ।