चौतारी मोरङको अध्यक्षमा चीना, बिष्टलाई शालिग्राम–मञ्जु दाहाल पत्रकारिता पुरस्कार

विराटनगर । प्रेस चौतारी मोरङको अध्यक्षमा चीना थापा निर्वाचित भएकी छन् । शनिबार विराटनगरमा सम्पन्न नवौं जिल्ला अधिवेशनबाट थापाको अध्यक्षतामा २१ सदस्यीय कार्यसमिति सर्वसम्मत चयन भएको हो ।

कार्यसमितिको उपाध्यक्षमा शशांक पौडेल, महिला उपाध्यक्षमा रञ्जना अधिकारी, सचिवमा नवराज भट्टराई, सहसचिवमा कृष्णचन्द्र सुवेदी, समावेशी सहसचिवमा राजकुमारी तामाङ र पुण्य पी अधिकारी सर्वसम्मत भएका हुन् ।

कार्यसमितिको सदस्यहरूमा निशान्त ढुंगाना, विशाल मण्डल, प्रमोद कार्की, सामना भट्टराई, संगीता राई, शिशिर राई, शिवशंकर परिहस्त, रोहन राई, दीपक खड्का, रामकुमार शर्मा, रोमा दाहाल, कुलदीप बाँस्तोला, विवेक खतिवडा र विदिशा भट्टराई चयन भएका हुन् ।

नवनिर्वाचित पदाधिकारी र सदस्यहरूलाई प्रेस चौतारी नेपालका केन्द्रीय अध्यक्ष गणेश बस्नेतले पद तथा गोपनियताको सपथ ग्रहण गराएका छन् । अध्यक्ष बस्नेतले विराटनगरमा चौतारीको दशौं राष्ट्रिय महाधिवेशन हुन लागेको भन्दै त्यसका लागि नवनिर्वाचित कार्यसमितिले सक्रिय रूपमा जिम्मेवारी निर्वाह गर्नुपर्ने बताए ।

चौतारी मोरङको नवौं जिल्ला अधिवेशनका अवसरमा शालिग्राम–मञ्जु दाहाल पत्रकारिता पुरस्कार विराटनगरका अग्रज पत्रकार महेन्द्र विष्टलाई प्रदान गरिएको छ । शनिबार बिष्टलाई नगद २१ हजार रूपैयाँ राशिको पुरस्कार कोशी प्रदेशका मुख्यमन्त्री हिक्मतकुमार कार्कीले हस्तान्तरण गरेका हुन् ।

प्रेस चौतारी मोरङ एवं नेपाल पत्रकार महासंघ मोरङको पूर्वअध्यक्ष समेत रहेका बिष्ट २०५१ सालयता सक्रिय पत्रकारितामा जोडिएर हाल महेन्द्र मोरङ क्याम्पसमा आमसञ्चार बिषयमा प्राध्यापन गर्दै आएका छन् ।

पुरस्कार छनोट समितिका सदस्य रामचन्द्र अधिकारीले कोशी प्रदेशभरीको भूगोलबाट बिष्टलाई  पुरस्कारका लागि छनोट गरिएको जानकारी दिएका थिए ।

अधिवेशन उद्घाटन गर्दै मुख्यमन्त्री कार्कीले नेकपा एमाले र नेपाली कांग्रेसबीचको सहमतीय सरकार बनेपछि मुलुकको आर्थिक क्षेत्र उत्साहित बनेको बताए । उनले दुई पार्टीबीचको सरकार बनेपछि आर्थिक क्षेत्रमा सकारात्मक नतिजा आउन थालेको बताए ।

‘एमाले र कांग्रेसबीचको सहमतिबाट बनेको यो सरकारबाट उत्साह छाएको छ, यसको सकारात्मक नतिजा आउन थालेको छ’ मुख्यमन्त्री कार्कीले भने, ‘अहिले राजस्वमा वृद्धि भइरहेको छ, निजी क्षेत्र पनि उत्साहित भएको छ, अर्थतन्त्र चलायमान भएको छ, २५ प्रतिशतले राजस्व वृद्धि भएको छ, यो सरकारका कारण मुलुकको राजश्व लक्ष्य पूरा हुने अवस्था बनेको छ ।’

मुख्यमन्त्री कार्कीले अध्यादेश ल्याउने कार्यलाई असंवैधानिक भएको भन्दै गलत प्रचार गरिएको बताए । संविधान अनुसार नै संसद नभएको बेलामा सरकारले अध्यादेशमार्फत कानुन बनाउन सक्ने व्यवस्थालाई सरकार विरोधीहरूले गलत हल्लाका रूपमा फैलाएको बताए ।