महिला दिवसमा जागृति महिलाको र्‍याली

विराटनगर । ११५ औं अन्तर्राष्ट्रिय महिला दिवसको सन्दर्भमा मोरङको कटहरी गाउँपालिकामा सचेतनामुलक र्‍याली निकालिएको छ । कटहरी–१ स्थित जागृति महिला उत्थान समाजको आयोजनामा र्‍याली निकालिएको हो । 

कटहरी वडा नं १ कार्यालय परिसरबाट निकालिएको र्‍यालीले महेशपुर चोक, चौधरीचोक, माझीचोक, जेएम युवा क्लबचोक हुँदै नारी विकासको कार्यालयसम्म पुगेको थियो । 

सो ठाउँमा अन्तरक्रियात्मक कार्यक्रम गर्दै र्‍याली फेरी वडा कार्यालय परिसर फर्किएको थियो । सो ठाउँमा कोणसभा गर्दै र्‍याली समापन भएको थियो । 

र्‍यालीका सहभागीले ‘ग्रामीण महिलाको सशक्तीकरण गरौं’ ‘समान सहभागिताको सुनिश्चितता, आजको आवश्यकता’, ‘नारी नै शक्ति हो’ र ‘नारी पुरुष बराबर, सभ्य समाजको आधार’ लगायतका महिला अधिकार तथा सचेतनासँग सम्बन्धित नारा लेखिएका प्लेकार्ड बोकेका थिए । 

ग्रामीण क्षेत्रमा अझै पनि पर्याप्त सचेतना नपुगेकाले महिला हिंसाका घटनाहरु प्रशस्त हुने गरेको जागृति महिला उत्थान समाजका अध्यक्ष सरस्वती यादवले बताइन् । 

उनले महिला हिंसा न्यूनीकरण तथा अन्तर्राष्ट्रिय महिला दिवस सफल बनाउन कार्यक्रम आयोजना गरिएको बताइन् । 

र्‍यालीमा आयोजक संस्था आबद्ध महिलाहरुका साथै महेशपुर र जमटोकी लागयतका क्षेत्रका स्थानीय महिलाहरुको सहभागिता थियो ।