सुरू भयो विराट एक्स्पो

विराटनगर । आठौं संस्करणको विराट एक्स्पो २०२५ शनिबारदेखि विराटनगर–१४ डिग्री क्याम्पसको मैदानमा भव्य रूपमा उद्घाटन गरिएको छ ।

एक्स्पोको उद्घाटन गर्न निम्ता गरिएका प्रधानमन्त्री केपी शर्मा ओली अस्वस्थ भएका र शनिबार विहानैदेखि विराटनगर विमानस्थल बाक्लो हुस्सुले ढाक्दा उनी समयमै आउन सक्ने अवस्था नबन्दा उपप्रधान एवं अर्थमन्त्री बिष्णु पौडेल आएर उद्घाटन गरेका छन् ।

उपप्रधानमन्त्री पौडेलले मुलुकको आर्थिक समृद्धिका लागि सरकार प्रतिबद्ध बताए । उनले मुलुकको समृद्धि र सामाजिक न्याय स्थापना गर्न सरकार प्रतिबद्ध रहेको बताएका हुन् । त्यसैगरी सरकारले आर्थिक, सामाजिक, शैक्षिक तथा औद्योगिक क्षेत्रका विभिन्न समस्या पहिचान गरेको बताउँदै त्यसलाई समाधान गर्न गम्भीर रहेको बताए ।

मन्त्री पौडेलले बैंकमा हाल कायम तरलता र ब्याजदर पनि एकल अंकमा आएको उल्लेख गर्दै यसबाट निजी क्षेत्रले लाभ लिइरहेको दाबी गरे । 

‘मुलुकमा राजनीतिक स्थायित्व हुँदा अर्थतन्त्रमा देखिएका समस्यमा समाधानमा सहज हुन्छ’ उनले भने, ‘अहिलेको सरकार नागरिकमा देखिएका निराशालाई आशामा बदल्ने गरी द्रुत गतिमा काम गरिरहेको छ, आर्थिक समृद्धिका लागि सरकार प्रतिवद्ध छ ।’

मन्त्री पौडेलले विराटनगर विमानस्थलको स्तरोन्नति गरी अन्तर्राष्ट्रिय विमानस्थल बनाउने, औद्योगिक ग्राम तथा औद्योगिक प्रदर्शनी केन्द्र निर्माण गर्ने र त्रिदेशी रानी–किमाथाङ्कासम्मको सडक निर्माण सम्पन्न गर्न सरकारले आवश्यक सहयोग गर्ने बताए ।

एक्स्पोको उद्घाटनका अवसरमा कोशी प्रदेशका मुख्यमन्त्री हिक्मतकुमार कार्कीले प्रदेशको आर्थिक विकासका लागि ठुल्ठूला एक्स्पोहरू अति आवश्यक भएको बताए । उनले निजी क्षेत्रले नियमित र व्यवस्थित रूपमा एक्स्पो आयोजना गर्नुपर्ने बताए । संगठनले आयोजना गरेको एक्स्पो मुलुककै लागि महत्व बोकेको र विभिन्न बिषयलाई समेट्न सकेको उनले बताए ।

विराटनगर महानगरपालिकाका प्रमुख नागेश कोइरालाले निजी क्षेत्रले इमान्दारीपूर्वक राज्यको काममा सहयोग गर्ने गरेको बताए । उनले एक्स्पोका कारण निजी क्षेत्रलाई मात्रै नभई स्थानीय सरकारलाई समेत फाइदा पुग्ने र विराटनगरको आर्थिक कारोबार बढ्ने बताए ।

नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले अर्थतन्त्रलाई चलायमान बनाउन एक्स्पोले ठुलो सहयोग गरेको बताएका थिए । उनले सरकारले सहयोग गरिरहेपनि आवश्यक मात्रामा भने अझै पनि सहयोग नभएको गुनासो गरे ।

अध्यक्ष राउतले प्रदेश सरकारले २०८२ साललाई कोशी प्रदेश पर्यटन बर्ष घोषणा गरेर अघि बढेको, प्रदेशमै पहिलो पटक परिणाममुखी रूपमा लगानी सम्मेलन गर्न लागेको र चिया सम्मेलनलाई समेत भव्य रूपमा आयोजना गर्ने तयारी गरेको भन्दै त्यसमा महासंघले सक्दो सहयोग गर्ने बताए ।

प्रदेशमा उद्योगधन्दा सञ्चालन गर्न दक्ष जनशक्तिको अभाव रहेकोले विदेशी लगानी भित्रिन छोडेको आयोजक उद्योग संगठन मोरङका अध्यक्ष राकेश सुरानाले बताए । उनले राजश्व दरमा हुने गरेको उच्च बृद्धिका कारण नेपाली उत्पादनले विदेशी उत्पादनसँग प्रतिस्पर्धा गर्न नसकेको बताए । 

उद्योग संगठन मोरङका उपाध्यक्ष एवं विराट एक्स्पोका संयोजक भोलेश्वर दुलालले माघ २० गतेसम्म आयोजना गरिएको एक्स्पोमा नेपाल, भारत, बंगलादेश र पाकिस्तान लगायतका मुलुकबाट समेत गरी २ सय ६८ वटा स्टलहरू एक्स्पोमा समावेश रहेको जानकारी दिए । एक्स्पोमार्फत औद्योगिक उत्पादनको प्रवद्र्धन र विक्री वितरण हुने बताए ।