कोशी सरकारले बनाएको १७ किलोमिटर कालोपत्रे सडक सञ्चालनमा

विराटनगर । कोशी प्रदेश सरकारको बजेटबाट बनेको करिव १७ किलोमिटर लामो कालोपत्रे सडक सञ्चालनमा आएको छ । तेह्रथुमको महत्वपूर्ण सडक सञ्जालको रुपमा रहेको सिधुवा-शुक्रबारे-ओख्रेसम्मको डबल लेन सडक बुधबार कोशी प्रदेशका मुख्यमन्त्री हिक्मतकुमार कार्कीले उद्‌घाटन गरेका छन् ।

कोशी प्रदेश सरकार भौतिक पूर्वाधार विकास मन्त्रालय अन्तरगत पूर्वाधार विकास कार्यालय संखुवासभाले ८९ करोड ९० लाख रुपैयाँको लागतमा सडक निर्माण सम्पन्न गरेको जनाइएको छ ।

संघीयताको कार्यन्वयनपछि बनेको प्रदेश तहले काम गर्न नसकिरहेको भन्दै आलोचना भइरहेको बेला धनकुटा र तेह्रथुम जिल्लालाई जोड्ने यो सडक निर्माणले त्यस क्षेत्रको आर्थिक गतिविधिमा महत्वपूर्ण योगदान पुग्ने जनाइएको छ । 

उक्त सडक निर्माणले तेह्रथुमको कृषि, पर्यटनको प्रर्वद्धनमा भूमिका खेल्ने स्थानीयले बताए । यो सडक धनकुटाको सिधुवाबाट सुरु भई तेह्रथुमको सदरमुकामसम्म पुर्‍याउने लक्ष्यका साथ निर्माण गरिएको हो । 

सडक सञ्जालको उद्‌घाटन गर्दै कोशी प्रदेशका मुख्यमन्त्री हिक्मतकुमार कार्कीले सडक निर्माणले स्थानीय बजार प्रर्वद्धन र विकासमा महत्वपूर्ण भूमिका खेल्ने बताए । उनले पहाडी जिल्लामा भइरहेको बसाइसराइ रोक्न, कृषि र पर्यटनलाई प्रर्वद्धन गर्न उक्त सडक महत्वपूर्ण हुने दाबी गरे ।

‘आज पहाडबाट बसाइसराइ बढ्दै गएको छ, यो रोक्न नीतिगत व्यवस्था गर्दै शिक्षा र स्वास्थ्यमा पनि सरकारले काम गर्ने छ’ उनले भने, ‘नयाँ संरचना हो हामी, राम्रा र देखाउन हुने काम गर्ने छौँ ।’

प्रदेश संरचना नयाँ भएपनि यसले महत्वपूर्ण काम गरिरहेको र कोशी प्रदेशको समृद्धिका लागि आगामी वर्ष कोशी पर्यटन वर्ष मनाउने तयारी भइरहेको पनि सोही अवसरमा जानकारी दिए ।

मुख्यमन्त्री कार्कीले बुधबार नै तेह्रथुमको छथर जोरपाटीको खेलकुद लगायत विभिन्न कार्यक्रममा सहभागिता जनाएको उनको सचिवालयले जनाएको छ ।