प्याब्सन खेल उत्सव शुक्रबारदेखि

विराटनगर । निजी तथा आवासीय विद्यालय अर्गनाइजेशन नेपाल (प्याब्सन) मोरङको आयोजनामा शुक्रबारदेखि १४ औं संस्करणको प्याब्सन स्पोट्र्स मिट (खेल उत्सव) हुने भएको छ ।

प्याब्सन मोरङले मंगलबार पत्रकार सम्मेलन गरी माघ १८ देखि २० गतेसम्म सञ्चालन हुने प्रतियोगितामा २५ भन्दा बढी विधाका खेलहरु समावेश गरिएको जनाएको छ । तीन दिनसम्म सञ्चालन हुने प्रतियोगितामा मोरङ प्याब्सनमा आवद्ध ३ हजार बढी विद्यार्थीहरुले भाग लिने प्याब्सन मोरङका अध्यक्ष जगत बस्नेतले जानकारी दिए ।

प्याब्सन मोरङले २०६३ सालदेखि हरेक वर्ष प्याब्सन खखेल उत्सव सञ्चालन गर्दै आएको छ । प्याब्सन स्पोट्र्स मिटमा कक्षा १० सम्मका छात्र र छात्रातर्फ गरी मैदानमा खेलाइने लङ जम्प, हाई जम्प, ट्रिपल जम्प, सर्ट पुट र जेभलिन थ्रोका स्पर्धा हुनेछन् ।

यस्तै फिल्ड स्पर्धामा भलिबल, टेबल टेनिस र फुटबल यू–१५ का स्पर्धाहरु हुनेछन् । ट्रयाक इभेन्टतर्फ कक्षा १० सम्म छात्र र छात्राहरुको अलग–अलग १ सय मिटर, २ सय मिटर, ४ सय मिटर, ८ सय मिटर, १५ सय मिटर दौड हुनेछ ।

यसैगरी सय गुणा ४ मिटर रिले दौड र ४ सय गुणा ४ मिटर रिले दौडका स्पर्धा हुने प्याब्सन मोरङका उपाध्यक्ष विष्णु डंगोलले जानकारी दिए । 

कक्षा ११ र १२ का विद्यार्थीहरुको लागि भने छात्रतर्फ भलिबल, फुटबल, टेबलटेनिस, बास्केटबल र म्याराथनका स्पर्धा हुनेछन् भने छात्रातर्फ भलिबल, टेबलटेनिस र म्याराथनका स्पर्धाहरु हुने जनाइएको छ ।