एमाले मोरङको प्रतिनिधि छनोट पूरा, अध्यक्षका चार आकांक्षी बनेनन् प्रतिनिधि

विराटनगर । यही फागुन १७ देखि १९ सम्मको मिति तोकिएको नेकपा एमाले मोरङको १० औं जिल्ला अधिवेशनको प्रतिनिधि छनोट सम्पन्न भएको छ । विराटनगर महानगरपालिकाको वडा नम्बर १४ मा भने शनिवारदेखि कै विवाद कायम छ । 

जिल्लाका १७ वटा स्थानीय तहका १५९ वटा वडा मध्ये आइतबार बेलुकासम्म १५८ वटा वडाको प्रतिनिधि छनोट सम्पन्न भएको नेकपा एमाले मोरङका सचिव रविन थापाले जानकारी दिए । थापाका अनुसार १५ वटा वडामा भने निर्वाचन प्रक्रियाबाट प्रतिनिधि छनोट भएका छन् । 

विराटनगर महानगरपालिकाको वडा नम्बर ५, ६, १५ र १७, ग्रामथानको वडा नम्बर ७, उर्लाबारीको वडा नम्बर ४, ७ र ८, रतुवामाईको ८ र ९, सुनबर्षीको १ र ५ नम्बर वडामा निर्वाचनबाट प्रतिनिधि छानिएका छन् । त्यसैगरी लेटाङको ३ र ५ तथा कटहरीको २ नम्बर वडामा पनि प्रतिनिधि छनोटका लागि निर्वाचन भएको जनाइएको छ ।

सुन्दरहरैंचा, कानेपोखरी, बुढीगंगा, धनपालथान, रंगेली, बेलबारी, केराबारी, मिक्लाजुङ, पथरीशनिश्चरे र जहदामा भने सर्वसम्मत रुपमा प्रतिनिधि छनोट भएको सचिव थापाले बताए ।

जिल्ला अधिवेशनका लागि एमालेले शनिबार भूगोलतर्फ एकैदिन १५९ वटा वडामा प्रतिनिधि छनोटको कार्यक्रम तय गरेको थियो । त्यस्तै जनसंगठन र विशेष क्षेत्रका लागि आइतबार प्रतिनिधि छनोटको मिति तोकिएको थियो । तोकिएको समयभित्रै प्रतिनिधि छनोट भएर प्रतिनिधिहरूको विवरण प्राप्त हुने क्रम जारी रहेको जनाइएको छ । 

प्रतिनिधि छनोटका लागि तयार पारिएको मापदण्ड अनुसार साढे नौ सय बढी प्रतिनिधिले अधिवेशनमा सहभागिता जनाउने अनुमान गरिएको छ । 

कोशी प्रदेशका १४ मध्ये सवैभन्दा ढिलो मोरङको जिल्ला अधिवेशन हुन लागेको हो । अधिवेशनमा अध्यक्ष पदका लागि ९ जनाले आफ्नो दाबी रहेको उद्घोष दैनिकलाई बताएका थिए । तर आइतबार प्रतिनिधि छनोट पूरा हुँदा अध्यक्षका आकांक्षीहरू मध्ये चार जना भने प्रतिनिधिमा छनोट भएनन् ।

अध्यक्षको आकांक्षीका रुपमा चर्चामा आएका इरान राई, रुपेश खतिवडा, पर्शुराम बस्नेत र अञ्जु उपाध्याय प्रतिनिधि नबनेका हुन् । राई र उपाध्यायले सर्वसम्मत् रुपमा प्रतिनिधि बन्न नसक्ने अवस्था बनेपछि मैदान छाडेका हुन् । 

उपाध्यायले मनोनयन दर्ता गरे पनि सर्वसम्मत नहुने अवस्था बनेपछि फिर्ता लिएको जनाइएको छ । खतिवडा र बस्नेत भने प्रतिनिधि छनोटको प्रक्रियामै सहभागी भएनन् । 

अध्यक्ष पदका आकांक्षीहरू मध्ये वर्तमान संगठन कमिटीका अध्यक्ष बाबुराम कार्की, जिल्ला समन्वय समिति मोरङका प्रमुख रहेका अजम्बर राई, कोशी प्रदेशसभाका पूर्व सदस्य राजकुमार ओझा, एमाले विराटनगर महानगर कमिटीका पूर्वअध्यक्ष सागर थापा प्रतिनिधिमा छनोट भएका छन् । त्यस्तै अध्यक्षको उम्मेदवार बन्ने चर्चामा रहेका एमाले नेता महेश भट्टराई पनि प्रतिनिधिमा छनोट भएका हुन् ।

निर्वाचनकै संकेत

नवौं अधिवेशनबाट सर्वसम्मत नेतृत्व चयन गरेको एमाले मोरङभित्र यसपटक भने सर्वसम्मतको प्रयास कार्यान्वयन नहुने संकेत प्रतिनिधि छनोटले देखाएको छ । 

धेरै वडामा प्रतिनिधि छनोटका क्रममा  निर्वाचनको मुखमा पुर्याएर अन्तिम समयमा सर्वसम्मत गरिएका कारण दशौं जिल्ला अधिवेशनको नेतृत्व चयन पनि निर्वाचनकै प्रक्रियाबाट अघि बढ्ने देखाएको नेता कार्यकर्ताहरू बताउँछन् ।

पार्टीमाथि चौतर्फी घेराबन्दी भएका कारण नेतृत्व निर्माणमा सर्वसम्मत गरेर संगठन सुदृढीकरणमा केन्द्रित हुनुपर्ने ‘लाइन’ एकातिर छ । 

अर्कोतिर सर्वसम्मतिको प्रयास विफल हुने अवस्था आए तत्कालै निर्वाचनमा गएर सौहार्दपूर्वक नेतृत्व चयन गर्नुको विकल्पमा जानुपर्ने लाइन पनि बलियो बन्दै गएको जनाइएको छ ।