एमाले मोरङको १०औं अधिवेशन : मतदान सुरु हुँदै

विराटनगर । दुई   दिनपछि धकेलिएको नेकपा एमाले मोरङको नयाँ नेतृत्व चयन गर्ने मतदान प्रक्रिया केहिबेरपछि सुरु हुने भएको छ । शनिबार उद्घाटन सत्र सकिए लगत्तै निर्वाचनको प्रक्रिया अघि बढ्न नसक्दा नेतृत्व चयनमा ढिलाई भएको हो ।

निर्वाचन कमिटीले बुधबार विहान ७ बजेबाट मतदान सुरु हुने घोषणा गरेको थियो । तर केहिबेर अझै समय लाग्ने जनाइएको छ । स्रोतका अनुसार बुधबार विहान ९ बजेदेखि मतदान हुने दाबी गरिएको छ ।

निर्वाचन कमिटीका प्रमुख निर्वाचन अधिकृत सुरेशलाल श्रेष्ठले एक पटकमा २० जनाले मतदान गर्ने व्यवस्था मिलाइएको बताए । 

१६५ सदस्यीय जिल्ला कमिटी चयनका लागि राजकुमार ओझा र अजम्बर राईको नेतृत्वमा प्यानल बनेको छ । दुवै प्यानल चुनावी मैदानमा उत्रिएका छन् ।

संस्थापन दाबी गर्ने समूहको नेतृत्व ओझाले गरेका छन् । उनको प्यानलबाट उपाध्यक्षमा शान्ति लिम्बू, सचिवमा रविन थापा, दुई उपसचिवमा शिल्पा निराला कार्की र इर्जालाल राजवंशी उम्मेदवार छन् ।

इतर समूहबाट अध्यक्षको उम्मेदवार अजम्बर राई हुन् । उनको नेतृत्वमा उपाध्यक्षमा सागर थापा, सचिवमा सोमराज थापा, उपसचिव द्वयमा सन्तोष बान्तवा र उषा झा उम्मेदवार रहेका छन् ।

मनोनयन दर्ता गरेका ३ सय २५ जना मध्ये ७१ जना सदस्यहरू भने निर्विरोध निर्वाचित भइसकेको जनाइएको छ । ५ पदाधिकारीसहित ९४ पदका लागि १ सय ९१ चुनावी मैदानमा कायम रहेका छन् ।

त्यस्तै मंगलबार ६३ जनाले उम्मेदवारी फिर्ता लिएका थिए । 

मतदान सम्पन्न भएपछि मतगणना भने एमाले मोरङको पार्टी कार्यालय पाञ्चालीमा हुने जनाइएको छ ।