एमाले मोरङको मतगणना सुरु

विराटनगर । नेकपा एमाले मोरङ जिल्ला कमिटीको नेतृत्व चयनका लागि मतगणना सुरु भएको छ ।

बिहीबार विहान ७ बजेदेखि सुरु हुने भनिएको मतगणना एमाले पार्टी कार्यालय पाञ्चालीमा अपरान्ह ३ बजेदेखि सुरु भएको हो । 

ढिलो गरी मतगणना सुरु भएको भन्दै निर्वाचन कमिटीसँग उम्मेदवारहरूले असन्तुष्टि जनाएका छन् । 

अध्यक्षसहितका उम्मेदवारहरूले पहिले एउटा मतपेटिकाको मतपत्र खन्याएर मिलाउने र त्यसलाई गणना गरेपछि अर्को मतपेटिकाको गणना गर्ने सहमति गरेका छन् ।

१६५ सदस्यीय जिल्ला कमिटी चयनका लागि राजकुमार ओझा र अजम्बर राईको नेतृत्वमा प्यानलै प्रतिष्पर्धामा उत्रिएका छन् ।

संस्थापन दाबी गर्ने समूहको नेतृत्व ओझाले गरेका छन् । उनको प्यानलबाट उपाध्यक्षमा शान्ति लिम्बू, सचिवमा रविन थापा, दुई उपसचिवमा शिल्पा निराला कार्की र इर्जालाल राजवंशी उम्मेदवार छन् ।

इतर समूहबाट अध्यक्षको उम्मेदवार अजम्बर राई हुन् । उनको नेतृत्वमा उपाध्यक्षमा सागर थापा, सचिवमा सोमराज थापा, उपसचिव द्वयमा सन्तोष बान्तवा र उषा झा उम्मेदवार रहेका छन् ।