बार काउन्सिलको चुनावमा आचार्य र ढकालको प्रतिस्पर्धा

विराटनगर । नेपाल बार काउन्सिल (नेपाल कानुन व्यवसायी परिषद) को कोशी प्रदेश सदस्य (पार्षद) एक जनाका लागि शनिबार हुने निर्वाचनमा दुई कानुन व्यवसायी मैदानमा उत्रिएका  छन् । सोका लागि अधिकवत्ता बालकृष्ण आचार्य (मोरङ) र अधिवक्ता राजु ढकाल (सुनसरी) प्रतिस्पर्धामा छन् ।

आचार्य एमाले, माओवादी,राप्रपा लगायतका बाम र देशभक्त गठवन्धनका उम्मेदवार हुन् भने ढकाल कांग्रेस समाजवादी सहितको गठवन्धनका उम्मेदवार हुन् ।

संघमा एमाले र नेपाली कांग्रेसको संयुक्त सरकार चलिरहको अवस्थामा बार काउन्सिलको चुनावमा भने उनीहरु छुट्टाछुट्टै प्यानल बनाएर मैदानमा उत्रिएका हुन् ।

कानुन व्यवसायीहरूको छाता संगठन नेपाल बार एसोसिएसनको केन्द्रीय निर्वाचनको पूर्वसन्ध्यामा वृहत् प्रगतिशील, गणतान्त्रिक, समाजवादी, स्वतन्त्र, देशभक्त, समावेशी गठबन्धन बनेको हो ।

उक्त गठबन्धनमा नेकपा एमालेनिकट वकिलहरूको संगठन पीपीएलए, माओवादीनिकट आरपीएलएएनका साथै पीएलए, एनपीएलए, एफएलए र एएनएलए गरी  ६ दल निकटका संस्थाहरु छन् । 

बार काउन्सिलको यस  निर्वाचनमा एमाले र माओवादीका उम्मेदवारलाई जिताउने र त्यसपछि फागुन २३ मा हुने नेपाल बारको निर्वाचनमा साझा उम्मेदवार बनाएर जाने सहमतिमा हस्ताक्षर भएको छ ।

सहमति पत्रमा एमालेनिकट पीपीएलएका अध्यक्ष भोजराज आचार्य, माओवादीनिकट आरपीएलएका अध्यक्ष रमणकुमार श्रेष्ठ, विप्लव नेकपानिकट पीएलएका अध्यक्ष कपिलचन्द्र पोखरेल, मोहन वैद्यनिकट एनपीएलएका अध्यक्ष देवकुमार मोक्तान र जसपा निकट एफएलएका अध्यक्ष दीपक राईले हस्ताक्षर गरेका छन् ।

यस्तै एएनएलएका अध्यक्ष अधिवक्ता पदम राउतले पनि छुट्टै वक्तव्य जारी गरी प्रगतिशील, राष्ट्रवादी, पेशागत समूहका उम्मेदवारलाई समर्थन गर्ने जनाएका छन् ।  

गठबन्धनका अनुसार सात प्रदेश मध्ये ५ प्रदेशमा एमाले र २ प्रदेशमा माओवादीनिकट उम्मेदवार छन् ।

सातै प्रदेशमा एमाले माओवादी गठबन्धनका उम्मेदवारलाई मतदान गर्ने सहमति भएको छ । सोही सम्झौतामा आगामी नेपाल बार एशोसिएसनको निर्वाचनमा साझा हित दृष्टिकोण र प्रतिबद्धता निर्माण गरी ऐकबद्ध भएर अघि बढ्ने सहमति भएको उल्लेख छ ।

कानुन व्यवासायीहरुको नियामक संस्था नेपाल बार काउन्सिलको पदेन अध्यक्षमा महान्याधिवक्ता, पदेन उपाध्यक्षमा नेपाल बार एसोसिएसनका अध्यक्ष, कानुन व्यवसायीहरुको मतदानबाट निर्वाचित सात प्रदेशका सात जना र  र मनोनित दुई गरी  एघार सदस्यीय हुन्छ । समितिको सदस्य सचिवमा नेपाल सरकारका न्यायसेवाका उपसचिव हुने व्यवस्था छ ।

काऊन्सिलको सो निर्वाचनमा मतदानका लागि अधिवक्ता र वरिष्ठ अधिवत्ताले मात्र हुने व्यवस्था छ । कोशी प्रदेशमा नौ सय ६६ मतदाता रहेको अधिवक्ता राजकुमार राउतले बताए ।

निर्वाचनमा कोशी प्रदेशको इलाम, झापा, धनकुटा, विराटनगर, उदयपुर गरी पाँच स्थानमा मतदान केन्द्र तोकिएको छ ।