मदन भण्डारी ट्रमा सेन्टरका लागि १४ करोड रुपैयाँ, नयाँ भवन र सिटी स्क्यान मेसिन खरिद गरिने

विराटनगर : कोशी प्रदेश सरकारले मोरङ मंगलबारेमा रहेको मदन भण्डारी अस्पताल तथा ट्रमा सेन्टरका लागि १४ करोड रुपैयाँ छुटाएको छ ।

प्रदेश सरकारले चालु आर्थिक वर्षमा अस्पतालका लागि आवश्यक सिटी स्क्यान मेसिन खरिद र ट्रमा सेन्टरको नयाँ भवन निर्माणका लागि १४  करोड ५० लाख रुपैयाँ विनियोजन गरेको हो ।

प्रदेश सरकारको रातो कितावमा उल्लेख भएअनुसार सिटी स्क्यान मेसिन खरिदका लागि ७ करोड ५० लाख र नयाँ भवन निर्माणका लागि ७ करोड रुपैयाँ विनियोजन गरिएको हो ।

प्रदेश सरकारले चार वर्षअघि तत्कालीन मंगलबारे प्राथमिक स्वास्थ्य केन्द्रलाई मदन भण्डारी अस्पताल तथा ट्रमा सेन्टरको रुपमा रुपान्तर गरेको थियो । तर प्रदेश सरकार मातहात अस्पताललाई ल्याउने काम भए पनि आवश्यक उपकरण र चिकित्सकको अभावमा ट्रमा सम्बन्धी सेवा सुचारु हुन सकेको छैन । त्यसैगरी अस्पतालका लागि आवश्यक भवनको अभाव हुँदा स्वास्थ्य सेवा समेत प्रभावित हुँदै आएको थियो ।

अस्पतालका निमित्त मेडिकल सुपरिटेन्डेन्ट डा देवराज घिमिरेले  प्रदेश सरकारले ट्रमा सेन्टर बनाउने घोषण गरेअनुरुप ट्रमा सेन्टरका लागि आवश्यक स्वास्थ्य उपकरण सिटी स्क्यान खरिद गर्न बजेट विनियोजन गरेकाले अब भने अस्पतालले सहज उपचार सेवा प्रदान गर्न सक्ने बताए । उनले अहिलेसम्म अस्पतालमा सिटी स्क्यान नहुँदा दुर्घटनासँग जोडिएका विरामीको उपचार गर्न नसकिएको बताए । जसले गर्दा बिरामीलाई अन्यत्र रेफर गर्नुपर्ने बाध्यता रहदै आएको बताए ।

निमित्त मेसु घिमिरेले मदन भण्डारी अस्पताल तथा ट्रमा सेन्टर घोषणा गरे पनि आवश्यक संरचना अभावमा उही प्राथमिक स्वास्थ्य केन्द्रको ५० शैय्यामा अस्पताल सीमित रहेको बताए । उनले अस्पतालको कुल २  विघा ६ कÝा जमिन रहेकाले नयाँ भवन निर्माणका लागि जग्गाको कुनै समस्या नरहेको बताए । 

निमित्त मेडिकल सुपरिटेन्डेन्ट घिमिरेले सरकारले ५० शय्याको अस्पतालसहितको ट्रमा सेन्टरका रूपमा विकास एवम् स्तरोन्नति गर्ने भने पनि पुरानै अवस्थाका भरमा अस्पतालबाट सेवा सञ्चालन गर्न बाध्य भएको बताए ।

उनले सरकारको निर्णयअनुसारको योजना कार्यान्वयनमा अहिलेसम्म जान समेत नसकेको बताए । ‘प्रदेश सरकारले १५ शय्याको अस्पताललाई स्तरोन्नति गरी ५० शय्या बनाउने निर्णय गरेको थियो’ निमित्त मेडिकल सुपरिटेन्डेन्ट घिमिरे भन्छन्, ‘सरकारको निर्णय अहिलेसम्म कार्यान्वयनको प्रक्रियामा जान सकेको छैन । अहिलेसम्म अफिसियल लेटर मात्र आएको छ ।’ उनले अस्पतालको नाम, लेटरप्याड र छाप परिवर्तन गर्ने बाहेकका अन्य काम अगाडि नबढेको पनि जानकारी दिए ।

कोसी प्रदेश सरकारले गत आर्थिक वर्ष २०७९/०८० मा ट्रमा सेन्टरलाई सिटी स्क्यान मेसिन उपलब्ध गराउन मेसिन खरिदका लागि ४ करोड रुपैयाँ छुटाएको भए पनि थियो । तर स्वास्थ्य मन्त्री र कर्मचारीको मिलोमतोमा रातो मेसिन खरिद शीर्षक रातो कितावमा राखिएको बजेट रकमान्तर गरी अन्य शीर्षकमा खर्च गरेको थियो । जसका कारण अस्पतालका लागि खरिद गर्ने भनिएको सिटी स्क्यान मेसिन खरिदको प्रक्रिया रोकिएको थियो ।

प्रदेश स्वास्थ्य आपूर्ति व्यवस्थापन केन्द्र मोरङले सिटी स्क्यान मेसिन खरिद गर्ने छुट्टाएको ४ करोड रुपैयाँ बजेट एम्बुलेन्स र शव वाहनका लागि बदमासीपूर्ण तबरले भुक्तानी दिएको थियो ।

प्रदेश स्वास्थ्य आपूर्ति व्यवस्थापन केन्द्र मोरङले आर्थिक वर्ष २०७८/८९ मा पाँच वटा एम्बुलेन्स र दुई वटा शव बाहान खरिद गरेको थियो । कोसी प्रदेश सरकारले युरोप, अमेरिका या जापानमा बनेको १२८/७४ स्लाइन्स सिटी स्क्यान मेसिन खरिद गरी अस्पताललाई दिने तयारी थियो ।

तत्कालीन प्रदेश १ सरकारले २०७६ पुस २२ गते बसेको मन्त्रिपरिषद् बैठकले साबिक १५ शय्याको अस्पताललाई विशेषज्ञ सेवासहितको ५० शय्यामा स्तरोन्नति गरी प्रदेश सरकार मातहत ल्याउने निर्णय गरेको थियो । सोहीअनुसार अस्पतालको नाम परिवर्तन गरी मदन भण्डारी अस्पताल तथा ट्रमा सेन्टर बनाइएको थियो ।

सरकारले मदन भण्डारी अस्पताल तथा ट्रमा सेन्टरका रुपमा घोषणा गरे पनि सामान्य सिटी स्क्यान मेसिन समेत नहुँदा सेवा शुरु हुन सकेको छैन । २०४९/०५० सालमा नेपाल सरकारबाट स्वीकृत भई प्राथमिक स्वास्थ्य केन्द्रको रूपमा उर्लाबारी–६, मंगलबारेमा अस्पताल स्थापना भएको थियो ।