व्यवस्थित शहरका लागि इटहरीमा छलफल

इटहरी । नेकपा एमाले कोशी प्रदेश कमिटीअन्तर्गतको सहरी विकास विभागले व्यवस्थित सहरी विकासका लागि लिनुपर्ने रणनीतिका विषयमा शनिबार इटहरीमा उपमहानगरस्तरीय छलफल कार्यक्रम गरेको छ ।

विभागले विराटनगरपछि दोस्रो सहर इटहरीमा ‘कोशी प्रदेशको सहरी विकासका लागि लिनुपर्ने नीति र गर्नुपर्ने कार्यहरूको सन्दर्भमा’ उपमहानगरस्तरीय गोष्ठी गरेको हो । यसअघि गत माघ ८ गते नेकपा एमाले कोशी प्रदेश कमिटीअन्तर्गतको सहरी विकास विभागले यस्तै छलफल गरेको थियो । यस सम्बन्धी छलफल विभिन्न नगरपालिकामा क्रमशः गरिदै लगिने विभागका प्रमुख लोकेश निरौलाले बताएका छन् । 

निरौलाको अध्यक्षतामा शनिबार इटहरीमा भएको कार्यक्रममा विभागका तर्फबाट सुनिल नेपालले कार्यपत्र प्रस्तुत गरेका थिए । उक्त छलफलमा कार्यक्रमका प्रमुख अतिथि नेकपा एमाले स्थायी कमिटी सदस्य भीम आचार्यले व्यवस्थित सहर निर्माण गरी पर्यटन, उद्योग तथा रोजगारीका अवसर सिर्जनामार्फत राष्ट्रिय अर्थतन्त्रमा सहयोग पुर्याउनुपर्ने धारणा व्यक्त गरे । उनले यसका लागि कस्ता प्रकारका कानून बनाउने तथा परिमार्जन गर्ने त्योतर्फ कदम चाल्नुपर्ने बताए । उनले अहिले देखिएको बसाइँसराइको दर कम गर्न व्यवस्थित सहरी नीति बनाउनुपर्ने बताउँदै त्यसका लागि एमाले कोशी प्रदेश कमिटी र प्रदेश सरकार लाग्नुपर्नेमा जोड दिए ।

कार्यक्रममा नेकपा एमालेका केन्द्रीय सदस्यहरू भगवती चौधरी, अमृता सुब्बा, इन्दु गौतम, कोशी प्रदेशसभा सदस्यहरू रोहितबहादुर कार्की, नीरा खनाल, इटहरीकी उपमेयर संगीता चौधरीलगायतले धारणा व्यक्त गरेका थिए । त्यस्तै विभागका तर्फबाट सुनिल नेपालले प्रस्तुत गरेको कार्यपत्रमाथि गणेश दाहाल, लेखनाथ घिमिरे, शालिकराम ढकाल, लीलाराज भट्टराई, मानध्वज मोक्तानलगायतले टिप्पणी गरेका थिए । त्यस्तै निर्वाचित जनप्रतिनिधिहरू प्रभात आचार्य, भुवन पोखरेल, दीपक घिमिरेले थप सुझाव पेश गरेको विभागका प्रमुख निरौलाले जानकारी दिए ।