कोशी प्रदेशका यातायात कार्यालयबाट अस्थायी लाइसेन्स दिन सुरु

विराटनगर । कोशी प्रदेशका यातायात कार्यालयहरूबाट अब ट्रायल पास गरेलगत्तै सवारी लाइसेन्स पाइने भएको छ । कोशी प्रदेश सरकारले बुधबारबाट यस्तो सुविधाको सुरुवात इटहरीस्थित यातायात कार्यालयबाट गरेको हो ।

कोशी प्रदेशका मुख्यमन्त्री हिक्मत कुमार कार्की र आन्तरिक मामिला तथा कानुनमन्त्री लिलाबल्लभ अधिकारीले सेवाग्राहीहरूलाई अस्थायी लाइसेन्स वितरण गर्दै यो सेवाको सुरुवात गरेका हुन् । 

यातायात व्यवस्था कार्यालयहरूबाट स्मार्ट लाइसेन्सका लागि तीन वर्षसम्म पर्खनुपर्ने अवस्थाको अन्त्य भएको उनले बताए । मुख्यमन्त्री कार्कीले प्रदेश सरकारले पहिलो पटक अस्थायी लाइसेन्स वितरण सुरु गरेको पनि बताए । 

उनले प्रदेशका नागरिकको हित र सुविधालाई प्रदेश सरकारले उच्च प्राथमिकता दिएको बताउँदै ट्रायल पास भएलगत्तै लाइसेन्स पाइने बताए । साथै सरकारले पासपोर्ट जस्तै लाइसेन्सलाई पनि आवश्यकता अनुसार वर्गीकरण गरेर अति आवश्यक भएका व्यक्तिहरूलाई थप केही शुल्क लिएर वितरण गर्ने बताए । 

कार्यक्रममा बोल्दै आन्तरिक मामिला तथा कानुनमन्त्री अधिकारीले यातायात व्यवस्था विभागले अस्थायी लाइसेन्स वितरणका लागि गरेको प्राविधिक सहयोग प्रति प्रशंसा व्यक्त गरे । उनले कोशी प्रदेशमै स्मार्ट लाइसेन्स छाप्ने गरीको तयारी भइरहेको जानकारी दिए ।

गत साउन ३२ मा भएको सातै प्रदेशका यातायात व्यवस्था मन्त्रालयका मन्त्रीहरूको संयुक्त बैठकले सवारी चालक अनुमतिपत्रको स्थायी कार्ड प्रदेशबाटै छाप्ने र स्थायी कार्ड छाप्ने व्यवस्थापन गर्न लाग्ने समयसम्म क्युआर कोड सहितको अस्थायी सवारी चालक अनुमतिपत्रको कार्ड वितरण गर्ने निर्णय गरेको थियो । सोही निर्णय अनुसार सबैभन्दा पहिलो पटक कोशी प्रदेशले अस्थायी कार्ड वितरणको थालनी गरेको हो ।

कोशी प्रदेश सरकार अन्तरगत हाल सवारी चालक अनुमतिपत्र जारी गर्ने यातायात व्यवस्था सेवा कार्यालयको सङ्ख्या ७ वटा रहेको छ । यो सुविधा अब ती सबै कार्यालयबाट प्राप्त हुने जनाइएको छ । 

अस्थायी लाइसेन्सको अवधि एक वर्षको हुनेछ । एकवर्षभित्रै स्थायी स्मार्ट लाइसेन्सको छपाई समेत प्रदेशबाटै गर्ने सरकारको तयारी छ ।

नयाँ, थप र प्रतिलिपिसमेत गरी अहिले कोशी प्रदेशबाट मासिक १८ हजार सवारी चालक अनुमतिपत्रको लागि निवेदन आउने गरेका छन् । तर यातायात व्यवस्था विभागले स्थायी (स्मार्ट) कार्ड छाप्न ढिलाई गरेपछि सेवाग्राहीहरू भने पैसा तिरेको रसिद बोकेर हिड्ने बाध्य भएका थिए ।