यही संविधानवाटै समाधान खोज्नुपर्छ : डा शेखर कोइराला

विराटनगर । नेपाली कांग्रेसका नेता डा शेखर कोइरालाले यही संविधानभित्र रहेर सबै समस्याको समाधान खोज्नुपर्ने बताएका छन् ।

मोरङको बूढीगंगा गाउँपालिका–१ मा निर्माण गर्न लागिएको बूढीगंगा पार्कको बिहीबार शिलान्यास गर्दै उनले संविधानभित्र रहेर शान्तिपूर्ण आन्दोलन गर्ने अधिकार सबैलाई रहेको चर्चा गर्दै उनले कुनै प्रकारको हिंसा आतङक, तोडफोड र आगजनी कांग्रेसलाई स्वीकार्य नहुने प्रष्ट पारे ।

गत शुक्रबार काठमाडौंमा भएको घटनाको निष्पक्ष छानविन हुनुपर्नेमा कोइरलाले जोड दिए । 

नेपाली जनतालाई विश्वास दिलाउन छानविन समिति बनाएर सो घटनाको जति सक्दो चाँडो सरकारले छानविन गर्नुपर्ने उनको भनाइ थियो । 

उनले बहुदलीय व्यवस्थालाई बलियो र दिगो बनाउन राजनीतिक दलहरू पनि सुध्रनु जरूरी रहेको बताए । नेपाली कांग्रेस र नेकपा एमाले दुई ठूला दल मिलेर सरकार निर्माण गर्दा संविधान संशोधन, आर्थिक विकास, सुशासन तथा रोजगारी सिर्जना गर्ने कुरा गरेपनि त्यसो हुन नसकेको कोइरालाले गुनासो गरे ।

जतिसक्दो चाँडो आपूmले गरेको प्रतिबद्धता पूरा गर्नेतर्फ दलहरूको ध्यान जानुपर्ने उनको भनाइ थियो ।

बूढीगंगामा निर्माण हुन लागेको पार्कलाई पर्यटनसँग जोड्न सके यसक्षेत्रमा वसोवास गर्ने समुदायहरूको आर्थिक उन्नतिमा सहयोग पुग्ने उनको भनाइ छ । 

गाउँपालिकाका अध्यक्ष जितनारायण थापा मगरले सो क्षेत्रलाई पर्यटकीय स्थलको रूपमा विकास गर्न पार्क निर्माण गर्न लागिएको बताए । 

कार्यक्रममा संविधानसभा सदस्य वीरेन्द्रकुमार माझी, कोशी प्रदेश योजना आयोगका सदस्य डा. प्रमिला गच्छदार, पालिकाका उपाध्यक्ष अमृताकुमारी गच्छदार, पालिकाका पूर्व अध्यक्ष बालचन्द माझीले पार्कलाई नमूनाको रूपमा विकास गर्नुपर्नेमा जोड दिए ।

सिंगिया खोलाको किनारमा रहेको नदी उकास जग्गामा २१ करोड रूपैयाँको लागतमा पार्क निर्माण गर्न लागिएको पालिकाले जनाएको छ ।

चार बिघा जग्गामा तीन वर्षमा निर्माण हुने सो पार्कका लागि पालिकाले पहिलो चरणमा डेढ करोड रकम विनियोजन गर्दै काम शुरू गरेको बताइएको छ ।