ट्राफिक सचेतना शुरु

विराटनगर । जिल्लामा दुर्घटना बढेपछि जिल्ला ट्राफिक प्रहरी कार्यालय मोरङले सचेतना अभियान शुरु गरेको छ ।

मोरङ जिल्लामा दुर्घटनाका कारण दैनिक सरदर एक जनाको मृत्यु हुने गरेको तथ्याङ्क सार्वजनिक भएपछि जिल्ला ट्राफिकले दुर्घटना न्यूनीकरणको उद्देश्यसहित अभियान शुरु गरेको हो । 

अधिकांश दुर्घटनामा दुई पाङ्ग्रे सवारीसाधन चालक पर्ने गरेको देखिएकाले मोटरसाइल र स्कुटर चालकलाई लक्षित गरी ट्राफिक प्रहरीले अभियान सञ्चालन गरेको हो । 

तीब्र गति र लागुपदार्थ तथा मादक पदार्थ सेवन गरी सवारी साधन कुदाउने कारणले दुर्घटना बढेको तथ्याङ्कहरुमा देखिएको छ । 

अभियानको क्रममा ट्राफिक प्रहरीले चोकचोकमा मोटरसाइकल र स्कुटी चालकलाई केही समय रोकेर दुर्घटनाको तथ्याङ्क बताउनुका साथै दुर्घटनाको कारण र कारक तत्वका बिषयमा जानकारी गराउने गरेको छ ।

अभियानको क्रममा जिल्ला ट्राफिक प्रहरी कार्यालय मोरङका प्रमुख प्रहरी निरीक्षक राजन लम्साल नेतृत्वको टोलीले सवारीचालकलाई चोक–चोकमा भेला गरी सचेतना प्रवाह गरिरहेको छ ।

ट्राफिक प्रहरीले सचेतना प्रवाह गर्नुका साथै महानगरका विभिन्न चोकहरुमा दुर्घटना न्यूनीकरण सम्बन्धि सचेतनामुलक पोष्टर तथा फ्लेक्स बोर्डहरु राखेको छ । 

सो क्रममा महानगरको अस्पतालचोक, महावीर, चोक घाँसचोक, जलजलामोड र रोडशेष चोक लगायतको क्षेत्रमा सचेतनामुलक कार्यक्रम गरी पोष्टर र बोर्डहरु राखिएको जिल्ला ट्राफिक प्रमुख लम्सालले जानकारी दिए ।