प्याब्सन प्रदेशको वरिष्ठ उपाध्यक्षमा बस्नेतको उम्मेदवारी

सुन्दरहरैंचा । निजी तथा आवासीय विद्यालय अर्गनाइजेसन (प्याब्सन) को कोशी प्रदेशको निर्वाचनमा वरिष्ठ उपाध्यक्षमा शिक्षासेवी अर्जुन बस्नेतले उम्मेदवारी दिने भएका छन् ।

विगत ३३ वर्षदेखि शिक्षा क्षेत्रमा सक्रिय रहेर कार्य गर्दै आएका बस्नेत सिद्धार्थ सेकेन्डरी स्कूल सुन्दरहरैंचाका संस्थापक प्रिन्सिपल हुन् । उनी प्याब्सनको कोशी प्रदेश समितिका उपाध्यक्ष हुन् ।

शिक्षासँगै समाजसेवामा विशेष चासो राख्ने बस्नेत अबको शिक्षा व्यावहारिक, प्रयोगात्मक र समयसापेक्ष हुनुपर्छ भन्ने मान्यता राख्छन् । उनी शिक्षा क्षेत्रमा कसैले अस्वस्थ प्रतिष्पर्धा गर्न जरूरी नभएको बताउँछन् ।

बस्नेतले निजी विद्यालयहरूको हकहित, गुणस्तरीय शिक्षा प्रवद्र्धन र शिक्षाको व्यावसायिकतासँगै सामाजिक उत्तरदायित्वलाई अघि बढाउने प्रतिवद्धता व्यक्त गरेका छन् । 

प्याब्सन मोरङको अध्यक्ष समेत भइसकेका बस्नेत उत्कृष्ट जिल्ला अध्यक्षको रुपमा प्याब्सन केन्द्रद्वारा सम्मानित समेत भएका व्यक्ति हुन् । 

निर्वाचनको मिति नजिकिदै जाँदा बस्नेतले आफ्नो उम्मेदवारीले शिक्षा क्षेत्रको सुधार, शिक्षकको हकहित र विद्यार्थीको उज्ज्वल भविष्यलाई केन्द्रमा राख्ने बताउँदै सबैलाई साथ र समर्थन गर्न आग्रह गरेका छन् ।