जनस्वास्थ्यमाथि गम्भीर खेलवाड: दलालमार्फत विरामी खरिद गर्छन् क्लिनिकहरु

विराटनगर, २१ कात्तिक : दलाल परिचालन गरेर उनीहरुमार्फत बिरामी खरिद गर्ने क्लिनिक विराटनगरमा छ्यापछ्यापती रहेको पाइएको छ । । राज्यको निकाय कमजोर हुँदा त्यस्ता क्लिनिकले बिरामीको स्वास्थ्यमा गम्भीर खेलवाड गरिरहेका छन् ।

कोशी प्रदेशकै ठूलो सरकारी अस्पताल कोशी अस्पतालमा आएका बिरामीलाई झुक्याएर उपचारको बहानामा रकम असुली गर्ने यस्ता क्लिनिक दुई दर्जन जति छन् । ममता हेल्थ क्लिनिकमा काम गरेर बिरामी झुक्याउन सिकेका सुनिल मण्डलले अहिले सुनिल हेल्थ केयर सञ्चालन गरेका छन् । सडकमा बिरामी खोज्ने शिवा कामतले सुनिललाई बिरामी दिन्छन् र प्रति बिरामी १५ सय रुपैंयाँसम्म लिन्छन् ।

भारतीय नागरिक सुरेन राय र अमिन मण्डलले पनि सुनिल क्लिनिकलाई बिरामी दिने गरेका छन् । करामा साह, जलिल मिया र मुसहरु ऋषिदेवले खुस फार्मेसीमा रहेको क्लिनिकलाई बिरामी दिने गरेका छन् । अमित मण्डल र स्वस्तिक मण्डलले सञ्चालन गरेको जानकी हेल्थ केयरले सुरेश पासवान र महादेव राय, रञ्जित मण्डलबाट बिरामी खरिद गर्ने गरेको बताइएको छ । 

सुमित साह र कन्हैया साहले सञ्चालन गरेको शुभ स्वस्तिक पोलिक्लिनिकले रिक्सा चालकमार्फत बिरामी लिने गरेका छन् । जानकी हेल्थ केयर, पपुलर क्लिनिकलगायतले पनि सडकमा हिंडेका बिरामी दलालमार्फत क्लिनिकमा तान्ने गरेका छन् ।

उनीहरुलाई रामा सोनार, विश्वेश्वर मण्डललगायतले बिरामी बुझाउने गरेका छन् । कोशी अस्पतालको ओपीडी (बहिरङ सेवा) को पुर्जी खुल्ने समय बिहान ८ देखि दिउँसो १२ बजेसम्म दलालहरु सडकमा सक्रिय देखिन्छन् ।

गोपाल मण्डल, रञ्जित मण्डल, शिवा यादवहरु एउटा बन्द गर्दै अर्को क्लिनिक सञ्चालन गर्नेहरु भएको अस्पताल चोकका स्थानीय बताउँछन् ।

कोशी अस्पतालमा भिड हुने भएकाले दलालले बिरामी र तिनका आफन्तलाई बाटोबाटै क्लिनिकमा लैजाने गरेका छन् । बिरामीलाई झुक्याएर विभिन्न परीक्षण गराई कमिशन लिने क्लिनिकहरु बिरुद्ध उजुरी भनें सायदै पर्ने गरेकाले उनीहरुले खुलेआम ठगी धन्दालाई सुचारु राखेको पाइन्छ ।

विराटनगर महानगरका प्रमुख नागेश कोइराला ठूला अस्पतालले पनि बिरामी ल्याउंनेलाई कमिशन दिने गरेको बताउँदै एम्बुलेन्स चालकमार्फत बिरामी तान्ने गरेको गुनासो आउने गरेको बताउँछन् । स्वास्थ्यमा खेलबाड गर्नेलाई प्रहरी र प्रशासनले कारवाही गर्न नसकेको उनको भनाइ छ । क्लिनिक सञ्चालन गर्न ब्यवसाय दर्ता महानगरमा अनिवार्य गर्नु पर्ने भएपनि धेरैले अनुमति लिएका छैनन् ।

मोरङका प्रहरी उपरीक्षक दीपक पोखरेलले बिरामी ठग्नेहरु बिरुद्ध उजुरी ल्याउन पीडितलाई आह्वान गरेका छन् । प्रहरीले बिरामी खरिद गर्ने क्लिनिक र खोज्ने दलालबारे निगरानी राख्ने जनाएको छ । दशैंताका दलाल पहिचान गर्न सादा पोशाकका प्रहरी कोशी अस्पताल पुग्दा बिरामी खोज्नेहरु लुकेका थिए । अस्पतालको छिमेकी प्रहरीले भनें सबै दलाल चिन्ने गरेको बताइएको छ ।