एमाले मोरङ अधिवेशन : मनोनित प्रतिनिधि छान्न पनि ढिलाइ

विराटनगर । नेकपा एमाले मोरङको १० औं जिल्ला अधिवेशन सुरु हुन दुई दिन मात्रै बाँकी हुँदा पनि प्रतिनिधि छनोट कार्य सकिएको छैन । निर्वाचनमार्फत चुनिने प्रतिनिधिहरू चयन भइसकेको भएपनि मनोनित हुन बाँकी प्रतिनिधि अझै चयन भएका छैनन् । 

‘कुल प्रतिनिधि संख्याको ५ प्रतिशत मनोनित हुने हो, शुक्रबारसम्ममा मनोनयन टुंगिएला भन्ने छ’, एमाले मोरङ इन्चार्ज जीवन घिमिरेले भने ‘४५ देखि ५० जना हाराहारी प्रतिनिधि मनोनित हुने छन् ।’ 

फागुन १७ देखि १९ गतेसम्म विराटनगरमा चल्ने अधिवेशनले एमाले मोरङको नयाँ नेतृत्व चयन गर्दैछ । जिल्ला संगठन कमिटी अध्यक्ष बाबुराम कार्कीले बुधबारसम्ममा प्रतिनिधि छनोट कार्य सम्पन्न हुने बताएका थिए । तर, मोरङमा देखिएको द्विपक्षीय विवादका कारण प्रतिनिधि मनोनयन कार्य अघि बढ्नै सकेको छैन । स्रोतका अनुसार अहिलेको संस्थापन पक्ष अन्तिम घडीमा मात्रै प्रतिनिधि छनोट गर्ने तयारीमा रहेको छ । 

मनोनित प्रतिनिधि छनोट प्रक्रिया अघि बढ्न नसकेका बेला निर्वाचन प्रक्रियाबाट छानिएका प्रतिनिधिहरूबारे पनि एमाले मोरङमा विवाद छ । खासगरी विराटनगर महानगर वडा नम्बर १४ बाट छानिएका प्रतिनिधिहरूबारे विवाद रहेको नेताहरूले बताएका छन् । 

‘निर्वाचन समितिले महानगरको १४ नम्बर वडामा जबरजस्ती र एकपक्षीय रुपमा प्रतिनिधि घोषणा गरेको छ’, विनोद ढकाल पक्षका नेता सागर थापाले भने ‘वडा नम्बर १४ मा पुनः प्रतिनिधि छनोट हुनुपर्छ भन्ने हाम्रो भनाइ छ ।’ यस विषयमा पार्टीको वडा कमिटीले खुला रुपमा असहमति दर्ज गर्ने थापाले दाबी गरे । 

वडा नम्बर १४ बाट सुनिता गिरी, मिना यादव, शेखर विश्वास, सन्तोष शर्मा, किर्तानन्द यादव र सूर्यनारायण महतोलाई निर्वाचन समितिले सर्वसम्मत प्रतिनिधि घोषणा गरेको थियो । 

उनीहरूमध्ये १४ नम्बर वडाका वडाध्यक्षसमेत रहेका महतोले एकपक्षीय रुपमा प्रतिनिधि छानिएको भन्दै प्रतिनिधि बन्न अस्वीकार गरेको थापाले जानकारी दिए । 

‘निर्वाचन हुँदा सबै हाम्रै पक्षका साथीहरू प्रतिनिधि भएर आउने अवस्था हुँदाहुँदै संस्थागत धाँधली गरेर एकपक्षीय रुपमा प्रतिनिधि छानिएको छ’, थापाले भने ‘यसले अधिवेशनलाई असर पुर्याउनेछ ।’ 

मोरङ एमाले अधिवेशनमा प्रष्टतः दुई समूह खडा भएको देखिएको छ । एकातिर केन्द्रदेखि प्रदेशसम्मका नेताहरूको एउटा टिम र अर्कातिर विनोद ढकाल एक्लैको अर्को टिम खडा हुने स्थिति मोरङमा बनेको छ । अधिवेशनको मिति नजिकै आइपुग्दासम्म पनि दुबै समूहले मोरङमा उम्मेदवारको अन्तिम टुंगो भने लगाइसकेका छैनन् । 

एमाले स्रोतका अनुसार अध्यक्ष केपी शर्मा ओली टिमको प्रतिनिधित्व गर्ने पार्टीका कोशी इन्चार्ज एवम् पूर्व मुख्यमन्त्री शेरधन राई, एमाले कोशी अध्यक्ष घनश्याम खतिवडा लगायतका नेताहरू राजकुमार ओझालाई अध्यक्षको रुपमा अघि सार्ने तयारीमा छन् ।

उनीहरूको योजनालाई मुख्यमन्त्री हिक्मतकुमार कार्की, जीवन घिमिरे लगायतका नेताहरूको पनि साथ रहेको स्रोतको भनाइ छ । यो टिमले जिल्ला उपाध्यक्षमा शान्ति लिम्बू र सचिवमा रविन थापालाई अघि सार्ने तयारी गरेको छ । यही टिमबाट बाबुराम कार्की पनि अध्यक्षको दौडमा छन् । 

संस्थापन समूहमै रहेर पनि कोशीमा फरक समूहको नेतृत्व गरिरहेका नेता विनोद ढकालका लागि मोरङ अधिवेशन पार्टीभित्रको आफ्नो शक्ति परीक्षणको निर्णायक घडी बनेर उपस्थित छ । 

यो समूहले पनि अहिलेसम्म जिल्ला अध्यक्षको उम्मेद्वार टुंग्याएको छैन । ढकाल समूहबाट अहिलेसम्म अध्यक्षको रुपमा मोरङ जिससका प्रमुख अजम्बर राई प्रचारमा छन् । 

उपाध्यक्षमा सागर थापा र सचिवमा सोम थापाको सम्भावना रहेको नेताहरू बताउँछन् । सहमतिको प्रयास चलिरहँदा दुबै पक्षले अहिलेको भन्दा फरक व्यक्तिलाई अघि सार्ने सम्भावना भएको पनि केही नेताले बताएका छन् ।