पत्रकार महासंघको अध्यक्षमा निर्मला शर्मा

विराटनगर । नेपाल पत्रकार महासंघको केन्द्रीय अध्यक्षमा निर्मला शर्मा निर्वाचित भएकी छन् । शर्मा पत्रकार महासंघमा पहिलो महिला अध्यक्ष बनेकी हुन् । उनीसँगै महासंघको केन्द्रीय समितिमा १३ जना महिला पत्रकार निर्वाचित भएका छन् । 

शर्मा प्रेस चौतारी नेपाल र नेपाल प्रेस युनियनको प्यानलबाट निर्वाचित भएकी हुन् । उनले ४ हजार २८२ मत प्राप्त गरिन् । अध्यक्षकै प्रतिष्पर्धीहरू मध्ये रमेश बिष्टले ३ हजार २०३ मत प्राप्त गरेका छन् । त्यस्तै देवीप्रसाद सापकोटाले २७० र लालसिंह लामाले ९६ मत प्राप्त गरेका छन् ।

महासंघको वरिष्ठ उपाध्यक्षमा युनियन निकट दिपक आचार्य निर्वाचित भएका छन् । आचार्यले ४ हजार २३० मत प्राप्त गरेका छन् । उपाध्यक्ष (महिला) मा चौतारीकी नीतु पण्डितले ४ हजार ७०५, उपाध्यक्ष (समावेशी) मा चौतारीकै उमिद प्रसाद बागचन्दले ४ हजार २९२ र महासचिवमा युनियनका रामप्रसाद दाहालले ४ हजार ८४ मत प्राप्त गर्दै निर्वाचित भएका छन् ।

महासंघका ६ सचिवहरू मध्ये खुला सचिवमा रमेश खतिवडाले ३ हजार ४००, महिला सचिवमा सोनी शर्माले ४ हजार ३४७, आदिवासी जनजाती सचिवमा सविन प्रियसनले ३ हजार ५३५, सचिव मधेसीमा अशोक कुमार तिवारीले ३ हजार ८५८ मत, सचिव (दलित) मा प्रकाश धौलाकोटीले ४ हजार ११० र सचिव (एसोसिएट) तर्फ बैकुण्ठ राज पराजुलीले ३ हजार ६४५ मत प्राप्त गर्दै विजयी भएका छन् ।

कोषाध्यक्षमा भने प्रेस सेन्टरसहितको प्यानलबाट रामकृष्ण अधिकारी निर्वाचित भएका छन् । युनियन चौतारी प्यानलका रामकृष्ण ज्ञवाली भने पराजित भएका छन् । निर्वाचित भएका अधिकारीले ३ हजार ८४७ र पराजित बनेका ज्ञवालीले ३ हजार ४६४ मत प्राप्त गरेको केन्द्रीय निर्वाचन समितिले जनाएको छ ।

महासंघको केन्द्रीय सदस्यहरूमा कोशी प्रदेशबाट कमल रिमाल (५२७ मत) र शंकर खरेल (४४२ मत) निर्वाचित भएका छन् । 

महासंघको केन्द्रीय कार्यसमितिमा कुल ४२ जना निर्वाचित भएका हुन् ।