शिक्षादीपको विज्ञान कार्यशालामा रोबोटिक्सदेखि सूचना प्रविधि प्रदर्शनीसम्म

विराटनगर । विराटनगरमा उत्कृष्ट शैक्षिक नतिजा निकाल्दै आएको शिक्षादीप कलेजले आइतबार विज्ञान संकायतर्फका विभिन्न विधामा विद्यार्थीहरूले तयार पारेका उपकरण तथा प्रविधीको प्रदर्शनी सम्पन्न भएको छ । 

कलेजका विद्यार्थीले बनाएका रोबोटिक्स, अन्तरिक्ष विज्ञान, एभिएशन र सूचना प्रविधि विज्ञानसम्बन्धि कार्यशालामा तयार पारिएका विभिन्न उपकरणहरू प्रदर्शनी गरिएको हो ।

उक्त अवसरमा विज्ञान संकायतर्फ कक्षा ११ को बार्षिक परीक्षामा छात्रातर्फ प्रथम हुने रचिता दंगाल, छात्रतर्फ प्रथम हुने रुसन दाहाल, कक्षा ११ व्यवस्थापन संकायको बार्षिक परीक्षामा प्रथम हुने छात्रा नेन्सी राजवंशी र प्रथम हुने छात्र रोशनकुमार महतोलाई सम्मानित गरिएको छ । 

कोशी प्रदेशका मुख्यमन्त्री हिक्मतकुमार कार्कीले उत्कृष्ट हुने विद्यार्थीहरूलाई सम्मानित गरेका हुन् । त्यसैगरी उत्कृष्ट शिक्षकका रुपमा राजेन्द्रप्रसाद यादव र सौगात भट्टराई, उत्कृष्ट कर्मचारीतर्फ दीपा बस्नेत केसी र दयाराम रिमालसमेत सम्मानित भएका छन् ।

मुख्यमन्त्री कार्कीले विराटनगरमा राम्रो शिक्षा प्रदान गर्ने शैक्षिक संस्थाका रुपमा शिक्षादीप कलेज स्थापित भएको बताए । उनले कोशी प्रदेशको राजधानीमा शिक्षादीप कलेज महत्वपूर्ण शैक्षिक केन्द्र रुपमा विकास भएको बताए । विज्ञान संकायका विद्यार्थीहरूले गरेको प्रदर्शनीले प्रविधिको क्षेत्रमा नेपाली युवा जनशक्तिले समेत नयाँ नयाँ सम्भावनाको बाटो देखाएको अनुभूति भएको मुख्यमन्त्री कार्कीले बताए ।

उक्त कार्यक्रममा विराटनगर महानगरपालिकाका मेयर नागेश कोइरालाले प्रविधिको अभ्यासमा शिक्षादीप कलेजले उत्कृष्ट बन्दै गएको बताए । समय अनुसारको शिक्षा दिनका लागि कलेजले प्रतिवद्धता देखाएको भन्दै उनले प्रशंसा गरे ।

कलेजका प्राचार्य ज्ञानु खड्काले अप्ठेरो अवस्थाबाट कलेज यहाँसम्म आइपुगेको अनुभूति सुनाए । उनले अहिलेसम्म कलेजले दुईसय बढी विद्यार्थीलाई निशुल्क रुपमा पढाइसकेको दाबी गरे । अहिले पनि पाँचजना विद्यार्थी पूर्ण रुपमा निशुल्क अध्ययनरत रहेको बताए ।

कलेजका संचालक समिति अध्यक्ष एवं कोशी प्रदेश सभाका सांसद भीम पराजुलीको अध्यक्षतामा आयोजित उक्त कार्यक्रममा मोरङका प्रमुख जिल्ला अधिकारी इन्द्रदेव यादव, हिसानका केन्द्रीय उपाध्यक्ष भेषराज पोखरेल लगायतले शुभकामना दिएका थिए ।