परिसंघ कोशीद्वारा मोरङका सुरक्षा प्रमुखहरुको स्वागत

विराटनगर । नेपाल उद्योग परिसंघ कोशी प्रदेश समितिले मोरङका प्रमुख जिल्ला अधिकारी इन्द्रदेव यादव र जिल्ला प्रहरी प्रमुख प्रहरी उपरीक्षक नारायण चिमरियालाई स्वागत गरेको छ । बिहीबार परिसंघ कोशीले विराटनगरस्थित सचिवालयमा  प्रजिअ यादव र प्रहरी उपरीक्षक चिमरियालाई स्वागत गरेको हो । 

परिसंघ कोशीका अध्यक्ष पवन कुमार सारडाले जिल्लामा आएका दुवैजनालाई भविष्यमा समेत स्मरणीय रहने गरि काम गर्न आग्रह गरे । अध्यक्ष सारडाले कोशी प्रदेशको अन्य जिल्लामा गरेका काम र अनुभवले समेत प्रदेशको उद्योगीहरुलाई प्रहरी र प्रशासनसँग समन्वय गरेर कार्य गर्ने सजिलो हुने बताए ।

त्यस्तै परिसंघका केन्द्रीय उपाध्यक्ष भीम घिमिरेले प्रहरी र प्रशासन प्रमुख दुवै जना सक्षम रहेको भन्दै जिल्लामा शान्ति सुरक्षा व्यवस्थान गर्न उत्कृष्ट ढंगले काम गर्नेमा विश्वास व्यक्त गरे । 

परिसंघका प्रमुख सल्लाहकार महेश जाजुले प्रशासन र प्रहरी प्रमुखहरुको निश्चित अवधिमा सरुवा हुने भएपनि आफ्नो कार्यकालमा गरेको कामले जिल्लामा इतिहास निर्माण गर्ने बताए । 

यसैबीच परिसंघ कोशीले मोरङ जिल्लाका प्रजिअ प्रेमप्रसाद भट्टराईको बिदाई गरेको छ । गृह मन्त्रालयको निर्णय अनुसार मोरङको प्रमुख जिल्ला अधिकारीबाट गृह मन्त्रालयमा सरुवा भएका भट्टराईलाई मोरङमा शान्ति सुरक्षा व्यवस्था कायम गर्न खेलेको भूमिकाको प्रशंसा गरेका थिए । उनीहरुलाई परिसंघ कोशीले सम्मानपत्रसहित बिदाई गरेको परिसंघका महानिर्देशक विजय हरि शर्माले जानकारी दिए ।