बाबुआमा, हजुरबा–आमा, मामामाइजू थुनामा

विराटनगर । मावली आएकी १४ वर्षीया बालिकाको हत्या गरेर पुरेको अवस्थामा शव फेला परेको घटनामा बाबुआमा,  मावली हजुरबा–आमा र मामामाइजूको संलग्नता हुन सक्ने देखिएपछि प्रहरीले नियन्त्रणमा लिएर अनुसन्धान थालेको जनाएको छ ।

भारतको बिहारबाट विराटनगर महानगरपालिका–५ स्थित मावलीमा आएकी बालिकाको हत्या गरी शव गाडेको एक सातापछि सडेको अवस्थामा शुक्रबार प्रहरीले निकालेको थियो ।

घटनामा संलग्न रहेको आशंकामा पक्राउ परेका आठमध्ये छ जनालाई अदालतबाट म्याद थप गरी हिरासतमा राखिएको प्रहरीले बताएको छ । गत माघ ११ गते राति बालिकाको हत्या गरेर पुरिएको प्रहरीले जनाएको छ ।

मोरङका प्रहरी नायव उपरीक्षक वेदप्रकाश जोशीका अनुसार बालिकाका बाबुआमा लालमोहन र राजकुमारी यादव, मावली तर्फका हजुरबा–आमा सरजुग मण्डल र बतासीदेवी मण्डल तथा मामामाइजू रामबाबु मण्डल र जानकीदेवी मण्डललाई म्याद थप गरेर अनुसन्धान जारी राखिएको छ ।

स्थानीय सरजुग मण्डलको घर पछाडि उनकी छोरीतर्फकी नातिनी १४ वर्षीया चाँदनी यादवको शव खनेर निकालिएको थियो ।

बालिकाको फरक धर्म मान्ने युवकसँग प्रेम सम्बन्ध रहेकाले छुटाउन भन्दै भारतको छप्राहा जिल्ला घर भएकी बालिकालाई उनकै बाबुआमा लालमोहन र राजकुमारीले मावलीमा ल्याएर छाडेका थिए । 

मावली हजुरबा धामी पनि रहेकाले झारफूक गरेर बालिकाको प्रेम सम्बन्ध छुटाउने प्रयास गर्न नेपाल ल्याइएको बताइएको छ ।

मावलीमा एक महिनादेखि बस्दै आएकी बालिकालाई स्थानीयले नदेखेपछि प्रहरीमा खबर गरेको बताइएको छ ।