स्वीस प्रतिनिधिहरूलाई मुख्यमन्त्रीको आग्रह : ‘स्थिरता छ, लगानी गर्नुस्’

विराटनगर । कोशी प्रदेशका मुख्यमन्त्री हिक्मतकुमार कार्कीले प्रमुख दातृ निकाय स्वीस सरकारका प्रतिनिधिहरूलाई प्रदेशमा राजनीतिक स्थिरता रहेका कारण लगानी बढाउन आग्रह गरेका छन् ।

आइतबार मुख्यमन्त्री तथा मन्त्रिपरिषद्को कार्यालयमा स्वीस सरकारका प्रतिनिधिहरूको भेटमा मुख्यमन्त्री कार्कीले नेपालको संघीयता र संविधान कार्यान्वयनका लागि गरेको स्वीस सरकारको सहयोग महत्वपूर्ण भएको बताए । 

मुख्यमन्त्री कार्कीले पछिल्लो समय राजनीतिक स्थिरता कायम भएको र यसको जगमा सरकारले आफ्नो कामलाई द्रुत गतिमा अगाडि बढाउने विश्वास दिलाउने बताए । सोही विश्वासका आधारमा प्रदेशमा थप सहयोग गर्न मुख्यमन्त्री कार्कीले आग्रह गरे ।

मुख्यमन्त्री कार्कीसँग नेपालका लागि स्वीस सरकारका प्रतिनिधि हेड अफ को–अपरेशन म्याथिस मेयर र सल्लाहकार नवीन वाग्लेसहितको प्रतिनिधिमण्डलले भेटवार्ता गरेको हो । 

उक्त अवसरमा मुख्यमन्त्री कार्कीले प्रदेशमा लगानी सम्मेलन, पर्यटन पर्यटन वर्ष र चिया सम्मेलनको तयारी गरेको र यसले प्रदेशलाई समृद्ध बनाउन सहयोग पुग्ने बताए । त्यसका लागि स्वीस सरकारलाई पनि सहकार्य गर्न आग्रह गरे । साथै मुलुकको वित्तीय संघीयता बलियो बनाउन स्वीस सरकारको भूमिका प्रशंसनीय रहेको मुख्यमन्त्री कार्कीले बताए ।

भेटवार्तामा मुख्यमन्त्री कार्कीले स्वीस सरकारले गरेको सहयोग र सहकार्यको प्रशंसा समेत गरे । ७५ वर्षदेखि नेपाल र स्वीस सरकारको सम्बन्ध रहेको चर्चा गरे । 

भेटघाटका अवसरमा हेड अफ को–अपरेसन म्याथिस मेयरले संघीयता बलियो बनाउनका लागि स्वीस सरकार सहयोग गर्न तयार रहेको बताए । 

प्रदेश सरकारले सात वर्ष पूरा गरेको अवसरमा शुभकामना व्यक्त गर्दै उनले संघीयता कार्यान्वयनका लागि स्वीस सरकार सहयोगी बन्ने बताए । 

मेयरले प्राविधिक शिक्षा र अन्य रणनीतिक परियोजनाका लागि सहयोग गर्न स्वीस सरकार तयार रहेको स्पष्ट पारे । साथै प्रदेशको राजस्व वृद्धि र पर्यटन प्रवद्र्धन गर्ने योजना राम्रो भएकोले त्यसमा स्वीस सरकारले सहकार्य रहने उल्लेख गरे ।