उपमेयर कार्कीले अन्तिम समयमा फेरिन् कित्ता

विराटनगर । विराटनगर महानगरपालिकाकी उपमेयर शिल्पा निराला कार्कीले जारी नेकपा एमाले मोरङको १० औं जिल्ला अधिवेशनमा अन्तिम समयमा आएर कित्ता परिवर्तन गरेकी छन् । उनले संस्थापन पक्षबाट उपसचिवको उम्मेदवारी दिएकी छन् । 

स्रोतका अनुसार, कार्कीलाई विभिन्न प्रकारको दवाव दिएर संस्थापन पक्षबाट उम्मेदवारी दिन बाध्य पारिएको हो । सर्वसम्मती भए जुनसुकै पदको जिम्मेवारी आफू लिन तयार रहेको बताउँदै आएकी कार्कीलाई चुनावी प्रतिष्पर्धामा धकेलेपछि उनी प्रतिनिधिसँग मत नमागी बसेकी छन् ।

कार्कीलाई पार्टीभित्रको विनोद ढकाल समूहले आफ्नो पक्षको रुपमा दावी गर्दै आएको थियो । उनी सोमबार बिहानसम्म पनि ढकाल समूहकै टिममा बसेर छलफलमा सहभागी थिइन् । उनले कुनै पनि हालतमा संस्थापन पक्षको उम्मेदवार नबन्ने आफ्नै अडानविपरीत उम्मेदवारी दिएकी हुन् ।   

नेकपा एमाले मोरङको १० औं अधिवेशन विराटनगरको होटल मनास्लुमा जारी छ । जिल्ला कमिटीको १६५ सदस्यका लागि निर्वाचन हुँदैछ । जसमा अध्यक्ष, उपाध्यक्ष, सचिव, उपसचिव २ सहित पाँच जना पदाधिकारी निर्वाचित हुँदैछन् ।

निर्वाचनमा एमालेभित्रको संस्थापन र इतर दुवैले अध्यक्षदेखि सदस्यसम्म उम्मेदवारी दर्ता गरेका छन् । संस्थापनबाट राजकुमार ओझा र इतर समूहअन्तर्गत विनाद ढकालले नेतृत्व गरेको समूहबाट अजम्बर राईले अध्यक्षमा उम्मेदवारी दिएका छन् ।

ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन् । त्यस्तै, ढकाल समूहबाट अध्यक्ष अजम्बर राई, उपाध्यक्ष सागर थापा, सचिव सोमराज थापा, उपसचिव सन्तोष वान्तवा र उषा झाले उम्मेदवारी दिएका छन् ।