महानगरस्तरीय कबड्डी प्रतियोगिता सुरु

विराटनगर । विराटनगरमा महानगरस्तरीय कबड्डी प्रतियोगिता सुरु भएको छ । मदन भण्डारी स्पोट्र्स एकेडेमी विराटनगर महानगर कमिटीको आयोजनामा सुरु भएको प्रतियोगिताको उद्घाटन खेलमा वडा नम्बर १४ विजयी भएको जनाइएको छ ।

वडा नम्बर १४ ले वडा नम्बर २ लाई ६२–२३ ले पराजित गरेको हो । त्यस्तै दोस्रो खेलमा वडा नम्बर १७ ले वडा नम्बर ८ लाई ५१–४४ ले पराजित गरेको जनाइएको छ । 

तेस्रो खेलमा वडा नम्बर ४ ले वडा नम्बर १२ लाई पराजित गरेको खेल संयोजक हमिद आजादले जानकारी दिए । पहिलो दिनको अन्तिम खेलमा वडा नम्बर १६ ले वडा नम्बर ७ लाई ५३–१६ को अन्तरले पराजित गरेको जनाइएको छ । 

प्रतियोगितामा प्रथम हुने टिमलाई नगद ५१ हजार रुपैया“सहित शिल्ड र प्रमाणपत्र प्रदान गरिने छ । दोस्रो हुने वडालाई ३१ हजार र तेस्रोलाई ११ हजार नगद पुरस्कार प्रदान गरिने संयोजक आजादले बताए । 

प्रतियोगिता माघ १७ गतेसम्म संचालन हुने प्रतियोगिताको उद्घाटन नेकपा एमालेका पूर्व केन्द्रीय सदस्य विनोद ढकालले गरेका हुन् । 

उनले खेलकुदको विकासमा स्थानीय सरकारले ध्यान दिनुपर्ने बताए । 

युवाहरुलाई अनुशासित बनाउन र स्वस्थ्य राख्न खेलकुदको महत्व रहेको ढकालले बताए । एमाले विराटनगरका नेता सागर थापाले खेलकुदको विकासमा पार्टीले विषेश ध्यान दिंदै आएको बताए । साथै, खेलाडीहरूले खेल खेलेरै जीविकोपार्जन गर्न सक्ने अवस्थाको सिर्जना गर्न सरकारसँग आग्रह गरे । 

अघिल्लो बर्षपनि महानगरस्तरीय कबड्डी प्रतियोगिताको भव्य रुपमा आयोजना गरेकोले यसपटक पनि प्रतियोगितालाई निरन्तरता दिएको एकेडेमी विराटनगर अध्यक्ष गोपाल झाले बताए ।