महिला टिमलाई विश्वकप पुर्याउने प्रशिक्षक रिजाल सम्मानित

विराटनगर । नेपाल प्रिमियर लिगको तयारीमा जुटेको विराटनगर किङ्सले युथ-१९ महिला टिमका प्रमुख प्रशिक्षक महेश रिजाललाई मंगलबार विराटनगरमा सम्मान गरेको छ । 

टिमले आफ्नो आधिकारिक जर्सी सार्वजनिक गर्न आयोजना गरेको कार्यक्रममा प्रशिक्षक रिजाल सम्मानित भएका हुन् । उनलाई कार्यक्रमका प्रमुख अतिथि मुख्यमन्त्री हिक्मतकुमार कार्कीले सम्मान पत्रद्वारा सम्मान गरेका हुन् ।

विराटनगर -५ का रिजालको प्रशिक्षणमा रहेको नेपालको युथ-१९ महिला टिम पहिलोपटक विश्वकपमा पुगेको छ । 

नेपालको महिला क्रिकेटले  इतिहासमै पहिलोपटक आफूलाई विश्वकपको मन्चमा उभ्याउँदा विराटनगरका रिजाल त्यसका प्रमुख नेतृत्वकर्ता बनेका थिए। देशलाई खुसी दिने यही कोशेढुंगा पार गराएका उनी गृहनगरमा सम्मानित भएका हुन् । 

नेपालको युथ -१९ महिला टिमले आउँदो डिसेम्बरमा एशिया कप र जनवरीमा विश्वकप खेल्दैछ ।