ग्रामथानमा अध्यक्षका उम्मेदवारविरुद्ध परेन दाबी विरोध उजुरी

विराटनगर । मोरङको ग्रामथान गाउँपालिकाकोे अध्यक्ष पदका लागि मनोनयन दर्ता गरेका कुनै पनि उम्मेदवारको विरोधमा दाबी विरोध उजुरी नपरेको जनाइएको छ । 

मुख्य निर्वाचन अधिकृतको कार्यालयका अनुसार अध्यक्ष पदका लागि एक स्वतन्त्रसहित १६ जनाले उम्मेदवारी दिएका छन् । 

उनीहरूमध्ये कसैको पनि विरोधमा दाबी विरोध दर्ता नभएको जनाइएको छ । दाबी विरोधका लागि सोमबार बिहान १० बजदेखि दिउँसो ३ बजेसम्मका लागि तोकिएको समयावधिमा कुनै पनि उजुरी नपरेको सहायक निर्वाचन अधिकृत रामराज पौडेलले बताए । 

२०७९ को स्थानीय तह निर्वाचनबाट निर्वाचित गाउँपालिका अध्यक्ष जयप्रकाश गच्छदारको गत असार ३ गते निधन भएपछि उपनिर्वाचन हुन लागेको हो । 

मुख्य निर्वाचन अधिकृतको कार्यालयले उम्मेदवारले पेश गरेको मनोनयन पत्र र उजुरी परेको भए त्यस्तो उजुरी उपर मंगलबार बेलुका ५ बजेसम्म जाँचबुझ गर्नेछ र ६ बजे उम्मेदवारको नामावली प्रकाशन गर्ने कार्यतालिका रहेको छ ।

नामावली प्रकाशित भएपछि बुधबार नाम फिर्ता लिने उम्मेदवारले आफ्नो उम्मेदवारी फिर्ता लिन सक्ने छन् । नाम फिर्ता लिएपछि बुधबार बेलुका ५ बजे उम्मेदवारको अन्तिम नामावली प्रकाशित गरिने जनाइएको छ ।