Biratnagar, Morang, Nepal
२३ चैत २०८१, शनिवार
+977 21 450305, 515728, 578305
कोशी

इक्युवालिटी कप क्रिकेटको उपाधि मोरङलाई

उद्‌घोष सम्वाददाता
२२ चैत २०८१, शुक्रवार

विराटनगर । चौथो संस्करणको इक्वालिटी कप क्रिकेट २०२५ को ट्रफी मोरङले उचालेको छ । नेपाल क्रिकेट फाउण्डेशनको आयोजनामा विराटनगर–६ स्थित म्येरिलिबोन ज्वाला क्रिकेट मैदानमा बिहीबार सम्पन्न भएको फाइनलमा साविक बिजेता मोरङले सप्तरीलाई ८ विकेटले पराजित गर्दै ट्रफी उचालेको हो ।

टस हारेर ब्याटिङ गरेको सप्तरीले निर्धारित २० ओभरमा ९ विकेट गुमाउँदै ८१ रन जोडेको थियो । सप्तरीका लागि साक्षी यादवले २८ रन बनाइन् । दीपा रामको अविजित १५ रनको योगदान रह्यो ।

प्लेयर अफ फाइनल घोषित मोरङकी कृतिषा धामीले ५ विकेट लिइन् । उनले कसिलो बलिङको मद्दतले ४ ओभरमा १ मेडन राख्दै ९ रनमात्रै दिइन् । बन्धना राजवंशीले पनि ३ विकेट लिएकी थिइन् ।

८२ रनको लक्ष्य पछ्याएको मोरङले ११ दशमलव १ बलमा २ विकेटको क्षतिमा लक्ष्य भेट्टाएको हो । बिजेता मोरङका लागि सानु राजवंशीले अविजित ४० रन बनाउँदा कप्तान टीका साहले १५ रनको योगदान दिइन् । 
सप्तरीका साक्षी यादव र अपेक्षा यादवले समान १–१ विकेट लिएका थिए ।

बिजयी खेलाडीलाई कोशी प्रदेश क्रिकेट संघका अध्यक्ष सर्वजितराज पाण्डे, मोरङ जिल्ला क्रिकेट संघका अध्यक्ष मोहमद साद बाबु र नेपाल क्रिकेट फाउण्डेशनका अध्यक्ष अविशेक श्रेष्ठलगायतले ट्रफी र प्रमाणपत्र हस्तान्तरण गरेका हुन् ।

प्रतियोगिताको प्लेयर अफ सिरिज सिरहाकी सरस्वती चौधरी घोषित भइन् । उत्कृष्ट ब्याटर सप्तरीकी साक्षी यादव बनिन् । 

उत्कृष्ट बलर मोरङकी कृतिषा धामी र उत्कृष्ट विकेट किपर मोरङकी प्रिन्सा राना मगर बनिन् ।

म्यारिलिबोन क्रिकेट क्लब फाउण्डेशन र क्रिकेट विदआउट बाउण्ड्रिजको सहयोगमा आयोजित प्रतियोगितालाई क्रिकेटमा महिलाको सहभागिता अभिवृद्धिको अभियानका रूपमा अघि बढाइएको जनाइएको हो ।

चौथो संस्करणसहित मोरङले यो ट्रफी लगातार तीन पटक उचाल्न सफल भएको छ । पहिलो संस्करणमा भने मोरङले झापासँग पराजित हुनु परेको थियो । 

यो प्रतियोगितामा इलाम, मोरङ, सिरहा र सप्तरी जिल्लाको महिला क्रिकेट टोली सहभागी रहेको थियो ।

View : 62

Get In Touch

Biratnagar, Morang, Nepal

+977 21 450305, 515728, 578305

udghosh@gmail.com

Copyright © 2023 -2025. Udghosh Daily. All Rights Reserved