आईसीसी टी–२० विश्वकप छनौट : विश्वकपको सपना साकार पार्न ओमानलाई जित्नैपर्ने दवावमा खेल्दै नेपाल

विराटनगर, १६ कात्तिक : आईसीसी टी–२० विश्वकप एसिया छनोटअन्तर्गत आज विहान ९ बजेदेखि नेपाल र ओमानबिच समूह चरणको अन्तिम खेल हुँदैछ ।

घरेलु मैदान कीर्तिपुरस्थित त्रिवि अन्तर्राष्ट्रिय क्रिकेट मैदानमा आफ्नो समूह ‘ए’ बाट लगातार दुई खेल जितेर सेमिफाइनल पुगिसकेको नेपाल र ओमान आफ्नो समूहको विजेता बन्ने दाउमा देखिन्छन् । 

नेपाल र ओमान दुवैले सिंगापुर र मलेसियालाई पराजित गर्दै अन्तिम चारको स्थान तय गरेका हुन् ।

अघिल्ला दुई खेलमा आक्रमण लय समातेको नेपाललाई घरेलु मैदानको साथ छ । नेपालले हजारौं समर्थकअघि चुनौतिपूर्ण खेल खेल्नुपर्ने छ ।  

ओमानलाई पराजित गरेको खण्डमा नेपालले क्रिकेट इतिहाँसमा १० वर्षपछि टी–२० विश्वकपका लागि टोली सुरक्षित गर्नेछ । यसअघि नेपालले २०१४ मा बंगलादेशमा भएको टी–२० विश्वकप खेलिसकेको छ । त्यसयताका छनौटमा भने नेपाली टोलीलाई भाग्यले साथ दिएको छैन ।

नेपालले जारी छनौट खेल अन्तरगत पहिलो खेलमा सिंगापुरलाई ८ विकेटले पराजित गरेको थियो । दोस्रो खेलमा मलेसियालाई ६ विकेटले पराजित गरेको हो । 

प्रतिद्वन्द्वी ओमानले पनि मलेसियालाई ३२ रन र सिंगापुरलाई २२ रनले पराजित गरेको थियो । 

आजै समुह चरणका अन्तिम चारवटै खेल हुने भएकोले सेमिफाइनल पुग्ने बाँकी दुई टिम र सेमिफाइनल समिकरण टुंगिने छ ।

समूह ‘बी’ अन्तरगतको यूएई र हङकङबीचको खेल मुलपानी क्रिकेट मैदानमा आजै बिहान ९ बजेदेखि हुनेछ ।