दुई महिनामा झण्डै सात अर्बको स्मार्टफोन आयात

काठमाडौँ, ११ असोज । चालु आर्थिक वर्षको पहिलो दुई महिनामा झण्डै सात अर्ब रुपैयाँको स्मार्टफोन आयात भएको छ । 

भन्सार विभागको तथ्याङ्कअनुसार ६ अर्ब ७० करोड ८१ लाख ५८ हजार बराबरको ४ लाख ५४ हजार ९ सय ५८ थान स्मार्टफोन आयात भएको हो । 

यस अवधिमा सबैभन्दा धेरै पेट्रोलियम पदार्थको आयात भएको छ । विभागका अनुसार ११ अर्ब ६ करोड ५२ लाख चार हजार बराबरको पेट्रोल आयात भएको छ । १३ अर्ब ६४ करोड ५२ लाख ५० करोड बराबरको डिजेल आयात भएको छ । 

त्यस्तै एलपी ग्यास ९ अर्ब ४२ करोड ५६ लाख ८५ हजार बराबरको आयात भएको छ । 

उक्त अवधिमा सवारी साधनको आयात पनि उच्च देखिएको छ । विभागले सार्वजनिक गरेको तथ्याङ्कअनुसार २ अर्ब ९४ करोड बराबरको मोटरसाइकल र २ अर्ब ४३ करोड २१ लाख २६ हजार बराबरको विद्युतीय सवारी आयात भएको छ । 

नेपालबाट बढी निर्यात हुनेमा कार्पेट, चिया, जुट र धागोलगायतका वस्तु छन् । 

विभागका अनुसार साउन र भदौ महिनामा सबैभन्दा धेरै १ अर्ब ९९ करोड ९६ लाख ७ हजार रुपैयाँ बराबरको कार्पेट निर्यात भएको छ । 

त्यस्तै १ अर्ब १४ करोड २४ लाख ३२ हजार बराबरको चिया निर्यात भएको छ । 

जुट, धागो, जुसलगायतका वस्तु बढी निर्यात हुनेमा रहेका छन् । 

चालु आर्थिक वर्ष २०८१/८२ को सुरुवाती दुई महिनामा कूल २ खर्ब ८७ अर्ब ६३ करोड ५७ लाख २८ हजार बराबरको वैदेशिक व्यापारमा नेपालले २ खर्ब ३७ अर्ब ४४ करोड ९५ लाख २३ हजार बराबर व्यापार घाटा व्यहोरेको छ । 

साउन र भदौ महिनामा २ खर्ब ६२ अर्ब ५४ करोड २६ लाख २६ हजार बराबरको आयात हुँदा २५ अर्ब ९ करोड ३१ लाख ३ हजार बराबरको मात्रै निर्यात भएको जनाइएको छ ।