शान्ति भगवती माविको ७२ औं वार्षिकोत्सवमा अक्षयकोष स्थापना

लेटाङ । मोरङ लेटाङ नगरपालिका–४ स्थित शान्ति भगवती माध्यमिक विद्यालयले स्थापनाको ७२ औं वार्षिकोत्सव आइतबार मनाएको छ । 

विद्यालय स्थापना दिवसको अवसरमा वि.सं. २०४९ सालको एसएलसी ब्याचका पूर्व विद्यार्थीहरूले तर्फबाट ३ लाख रुपैयाँ बराबरको अक्षयकोष स्थापनाका लागि चेक हस्तान्तरण गरेका छन् । 

सोही अवसरमा लेटाङका समाजसेवी एवं पूर्वविद्यार्थी समाजका उपाध्यक्ष ओमप्रकाश श्रेष्ठ र श्रीमती मीनादेवी श्रेष्ठले आफ्ना स्वर्गीय बुवा तेजकुमार श्रेष्ठ र आमा शान्तादेवी श्रेष्ठको स्मृतिमा ५१ हजार १११ रुपैयाँ राशीको ‘तेज–शान्ता स्मृति छात्रवृत्ति’ अक्षयकोष स्थापना गरेको घोषणा गरेका हुन् ।

उक्त अक्षयकोषबाट प्राप्त भएको ब्याज रकमबाट विद्यालयमा अध्ययनरत गरीव र जेहेन्दार विद्यालयलाई आगामी बर्षको वार्षिकोत्सवकै अवसरमा प्रदान गरिने जनाइएको छ । 

विद्यालय व्यवस्थापन समितिका अध्यक्ष रामकुमार श्रेष्ठको अध्यक्षतामा आयोजित वार्षिकोत्सव कार्यक्रमको उद्घाटन लेटाङ नगरपालिकाका मेयर भूपेन्द्रकुमार लावती र उपमेयर कृष्णकुमारी निरौलाले संयुक्त रुपमा गरेका थिए ।

विक्रम सम्बत् २००९ सालमा स्थापित भएर लेटाङकै शैक्षिक केन्द्रका रुपमा चिनिएको शान्ति भगवती माविको ७२ औं बार्षिकोत्सवको उद्घाटन भने विद्यालयकै विज्ञान विषयमा अध्ययनरत विद्यार्थीहरूले निर्माण गरेको रोबोटबाट रिबन काटेर गरिएको थियो ।

वार्षिकोत्सवमा विद्यालयको स्थापनादेखि हालसम्म गरेका कामको प्रगति प्रतिवेदन तथा आयव्ययबारे प्रधानाध्यापक श्रीप्रसाद ढकालले प्रस्तुत गरेका थिए ।

सोही अवसरमा विद्यालयले विगतमा उत्कृष्टता हाँसिल गर्ने विद्यार्थीहरूलाई पुरस्कार प्रदान गरिएको जनाइएको छ ।