उखु किसानलाई सशक्त बनाउँदै नेपाल डिस्टिलरिज

विराटनगर । सीमान्तकृत उखु किसानहरूको दिगो विकासका लागि नेपाल डिस्टिलरिज प्रालिले विशेष अभियान सुरु गरेको छ । उखु किसानहरूको सशक्तिकरणका लागि कम्पनीले क्षमता अभिवृद्धिलगायतका कार्यक्रम सुरु गरेको हो ।

नेपाल डिस्टिलरिज मादक पेय पदार्थ उत्पादक कम्पनी हो । यो कम्पनी खुकुरी ब्राण्डको रमका लागि प्रख्यात छ । उखु रमका लागि मुख्य कच्चा पदार्थ भएकाले कम्पनीले उखु खेती र कृषिको विकासका विशेष जोड दिदै आएको छ ।

सोही क्रममा कम्पनीले कोशी प्रदेशको विराटनगर र मधेस प्रदेशको सर्लाही लालवन्दीमा क्षमता अभिवृद्धि तालिम कार्यक्रम आयोजना गरेको जनाएको छ । यी दुवै प्रदेश उखु खेतीको पकेट एरिया मानिन्छ । कम्पनीका अनुसार, विराटनगरमा आयोजित कार्यक्रममा कोशी प्रदेशका मुख्यमन्त्री, मोरङ जिल्लाका प्रमुख जिल्ला अधिकारी, प्रदेश योजना आयोगका सदस्य, विराटनगर महानगरपालिकाका मेयरलगायत स्थानीय नेता तथा विशिष्ट व्यक्तित्वहरूको उपस्थिति थियो । त्यसै गरी सर्लाहीको लालवन्दीमा भएको कार्यक्रममा लालवन्दी नगरपालिकाका मेयरलगायत स्थानीय नेता तथा विशिष्ट व्यक्तित्वहरूको उपस्थिति रहेको कम्पनीले जनाएको छ ।

तालिममा सहभागी ८० जना कृषकहरूबाट कृषि उत्पादकत्व र लचिलोपन सुधार गर्न आवश्यक सीप र ज्ञान हासिल गर्ने अपेक्षा राखिएको कम्पनीले उल्लेख गरको छ । तालिमले दिगो खाद्य उत्पादन प्रणाली र लचिलो कृषि प्रविधिहरूमा जोड दिदै किसानहरूलाई वातावरणीय रूपमा स्वस्थ र जलवायुमैत्री अभ्यासहरू अपनाउन सशक्त बनाएको नेपाल डिस्टिलरिज प्रालिले जनाएको छ ।