बुधबार विहान ७ बजेदेखि अपरान्ह ४ बजेसम्म मतदान

विराटनगर । नेकपा एमाले मोरङको जारी १० औं जिल्ला अधिवेशनबाट नया“ नेतृत्व चयनका लागि बुधबार विहान मतदान हुने निश्चित भएको छ । निर्वाचन कमिटीले बुधबार विहान ७ बजेदेखि अपरान्ह ४ बजेसम्म निर्वाचन हुने घोषणा गरेको छ ।

सदस्यतर्फका उम्मेदवारहरूलाई मनोनयन फिर्ता गर्न मंगलबार दिनभरको समय छाडिएका कारण समयमै निर्वाचनको प्रक्रिया अघि बढ्न नसकेको हो । भोली विहानै होटल मनास्लु इनमै मतदान हुने जनाइएको छ ।

निर्वाचन कमिटीले मतपत्र छाप्न र अन्य तयारी गर्न मंगलबार राती १० बजेसम्म समय लाग्ने बताएको थियो । राती निर्वाचन नगर्ने बिषयमा पदाधिकारीतर्फका उम्मेदवारहरूको समेत उपस्थितिमा भएको बैठकले बुधबार विहानमात्रै मतदान प्रक्रिया अघि बढाउने निर्णय गरेको जनाइएको छ ।

अधिवेशनमा पार्टीको संस्थापन लाइन भन्दै अध्यक्षमा राजकुमार ओझा प्यानलै चुनावी मैदानमा उत्रिएका छन् । त्यसैगरी इतर पक्षबाट अजम्बर राईको पदाधिकारीसहितको प्यानल रहेको छ ।

भोली विहानमात्रै मतदान हुने भएका कारण प्रतिनिधिहरू अधिवेशन स्थलमा पातलिएका छन् । मंगलबार नै मतदान हुने भनिएका कारण उम्मेदवारहरू दिनभर अधिवेशन प्रतिनिधिसँग भोट माग्न व्यस्त बनेका थिए ।