बीपीमा नेपालकै पहिलो थ्रीडी चाल विश्लेषण प्रयोगशाला

विराटनगर, २५ मंसिर : धरानस्थित बीपी कोइराला स्वास्थ्य विज्ञान प्रतिष्ठानमा नेपालकै पहिलो थ्रीडी चाल विश्लेषण प्रयोगशालाको स्थापना भएको छ । स्वीजरल्याण्डको जेनेभा विश्वविद्यालय अस्पतालको सहयोगमा प्रतिष्ठानको हाडजोर्नी विभागअन्तर्गत सो प्रयोगशाला स्थापना भएको हो । 

प्रतिष्ठानका अनुसार जेनेभा विश्वविद्यालय अस्पतालबाट आएका तीन जना विशेषज्ञको टोलीले प्रयोगशाला स्थापना गर्न सहयोग गर्नुका साथै एवं जनशक्तिलाई सो सम्बन्धी तालिम प्रदान गरेका थिए । सो टोलीमा बाल हाडजोर्नी विशेषज्ञ डा जेराल्डो डिकुलन, प्रा स्टिफेन आरमान्ड र एलिस बोनेफोइ थिए । 

कतिपय मानिसहरुको सेरेबल पाल्सीका कारण, विभिन्न शल्यक्रियाका कारण वा अन्य हाडजोर्नी सम्बन्धी कतिपय रोगका कारण हिडाइको चाल नमिल्ने, हिड्नमा कठिनाई हुने हुन्छ । त्यस्ता मानिसहरुको हिडाइ वा चाल ठिक गर्न प्रयोगशालाले मद्दत पुर्‍याउने बताइएको छ ।

प्रयोगशालाभित्र उच्च प्रविधिका आठ वटा क्यामेरा विभिन्न कोणमा जडान गरिएको छ । त्यस्ता बिरामीहरुको उपचारमा बिरामीलाई हिड्न लगाएर सबै कोणबाट बिरामीको चालको भिडियो र ग्राफिक्सहरु लिई उच्च प्रविधिको कम्प्युटरद्वारा सो भिडियो तथा ग्राफिक्सहरुको विश्लेषण गरी समस्याको पहिचान गरिने चिकित्सकहरुले बताएका छन् । जसबाट विशेषज्ञहरुलाई बिरामी उपचारमा मद्दत पुग्दछ । 

बीपीको हाडजोर्नी विभागका सहायक प्राध्यापकद्वय डा आशिष पाण्डे, डा अमित लिम्बू र अर्थोटिष्ट् एवम् प्रोस्थेटिष्ट अमन श्रेष्ठ र फिजियोथेरापिष्ट मुजाहिद हुसेनले सो प्रयोगशाला सम्बन्धी तालिम लिएका छन् ।